聖誕節將到，今個周末各大聯賽都安排了打吡大戰，讓球迷提早歡度佳節；強勁戲碼包括：阿仙奴對熱刺、巴塞隆拿對皇家馬德里及國際米蘭對AC米蘭。〈拉闊足球場〉的牽牛和Natalie，早前再次出動，訪問了兩位西甲球迷，結果是一面倒支持巴塞！
藍鑽石今集提供
星期六3 阿仙奴對熱刺 1:1（7倍）
星期日10國際米蘭對AC米蘭 2:2（11倍）
星期日28巴塞隆拿對皇家馬德里 3:1（14倍）
牛：牽牛 N：Natalie A：Andrew 陳：陳先生
細哨撐住巴塞小勝
N：先生，我叫Natalie。睇你全身巴塞打扮，知唔知今周有場巴塞對皇馬？
A：Hello，我叫Andrew。當然知啦，仲對巴塞信心十足，覺得佢哋會送份聖誕禮物畀大家！
牛：但係呢一場美斯有傷，可能唔出得噃，中前場無咗佢，驚唔驚呀。
A：美斯今年咁fit，唔出得當然會擔心，不過巴塞整體實力強勁，應該可以照贏死對頭皇馬。
牛：上季兩隊對碰，細哨就一個扭幾個，預計佢今仗對皇馬時會上陣，你覺得佢仲可唔可以照辦煮碗，幫巴塞贏波？
A：我相信細哨唔會令球迷失望，一定會有好表現畀球迷睇。
牛：咁你今場心水波膽係乜？
A：2:1喇，巴塞小勝一球最正路！
雙雄接戰「大」得起
N：今個禮拜咁多好波，你會鍾意睇邊場多啲？
陳：梗係睇巴塞對皇馬啦。
牛：咁你捧邊隊？
陳：我就睇好巴塞多啲，因為佢哋主場對皇馬一向有保證；就算美斯傷咗，都可以秤高啲。
牛：皇馬呢期有「弗」到爆嘅羅賓奴，場場都入波「啜奶嘴」（慶祝入球動作），擔唔擔心先？
陳：唔擔心，巴塞有佩奧爾同馬基斯鎮守後防，一定頂得住。
牛：你嘅心水波膽係咩比數？
陳：呢幾年兩隊對碰都係大手交易，我就估巴塞贏4:1、4:2。
牛：嘩，去到咁盡，祝你呢個「大波膽」順利開出喇！
阿仙奴主場靠得住
今仗熱刺有隊中首席射手羅比堅尼，停賽期滿復出，大大增加球隊攻力；不過區先生依然對阿仙奴充滿信心。他認為單憑阿仙奴今季在主場8勝1負的成績，已足夠叫他捧場。
其他兩場打吡戰，區先生認為主隊同樣可以秤先，所以捧國米可贏AC；以及主場的巴塞喺呢場西班牙國家打吡會戰成2:2。
區先生心水：星期六3阿仙奴勝熱刺 3:2（23倍）
AC撼死敵要秤先
Ringo今集火氣十足，大鬧藍鑽石身為ACfans，都唔撐愛隊贏波。Ringo認為AC喺意甲失地甚多，今仗知恥近乎勇，一定會搏盡，所以撐AC作客贏2:1。
Mike見Ringo意氣風發，就講咗呢場波嘅「詭異之處」，事關AC雖然作客，其實一樣喺聖西路球場打，而AC今季聯賽在此出擊都未贏過，所以不宜高估。
Ringo心水：星期日10國際米蘭負AC米蘭 1:2（12倍）
〈拉闊足球場〉
下次舉行日期：27/12
想參加？即上
http://soccer.atnext.com/jp/soccer