銅鑼灣網友Frederick睇好今年表現「超級神勇」嘅蒙古能源（276），噚日仲沽晒手上嘅中油香港（135），喺10.9蚊價位換馬到蒙古能源。蒙古能源噚日低開0.4%，股價最高反彈上升2.2%，最後收報10.9蚊，下跌0.6%，但呢隻股由今年年頭0.179元升到𠵱家嘅10.9蚊，全年升近60倍，都咪話唔神奇。
朋友賺咗架車
點解追捧蒙古能源？Frederick就話：「呢隻股犀利囉，市盈率過千倍，之前有個朋友喺兩個幾入貨，自己仲笑佢㖭！點知越笑，蒙古能源就越升，個朋友仲賺到買咗架車，咪諗住既然奇迹發生過一次，估計有可能再發生多一次，咪忍唔住入貨囉。」
亨達集團研究部董事黃敏碩就話：「奇迹通常唔會喺同一間公司發生兩次㗎，投資股票要睇前景同消息，冇得話講奇迹。」
孫柏文亦話：「中油香港有業務，泵緊油，而蒙古能源話就話自己係煤炭股，但就仲未掘到煤，得個信念，都唔知第一批煤炭幾時出土，當個信念一爆破，股價可以跌得好急好快。」
Frederick仲話：「聽講蒙古能源其中一個股東叫何厚鏘，唔知會唔會同澳門特首何厚鏵有關係？如果係，咁蒙能就有得炒作。」黃敏碩同孫柏文都話冇聽過噃，孫柏文仲講笑咁話：「如果何厚鏘真係同何厚鏵有關，佢應該變身做濠賭股會着數啲！」
翻查資料，何厚鏘原來係何添個細仔，亦即係何厚鏵嘅堂細佬；話時話，原來佢喺10月兩度增持咗蒙能，現時共持有9.84%股權。
神華「有績可尋」
黃敏碩提醒佢：「Frederick記住定好止蝕價，仲要set高啲，建議定喺50天平均線10.4蚊位置，仲要見好就收，股價有機會上到11.8至12蚊就好走貨。」
他建議：「如果有興趣買煤炭股，倒不如入龍頭股中國神華（1088），起碼『有績可尋』（有業績支持）。」孫柏文插嘴：「仲係有煤可尋！」
長實（001）
三度推介還看首都
九龍塘楊小姐興致勃勃，原來係打上嚟報喜，事關佢今個禮拜二貼隻中煤能源（1898），當時叫人22.7蚊入貨，用噚日收市價23.85蚊計，中煤三日累升5%，成績唔錯。佢今次再推介另一隻股份長實（001），「我之前兩次推薦佢，一次升到150蚊嘅目標，第二次市況不就，地產股跌得好甘；今次佢再去到140蚊邊，呢幾日地產股又動力十足，所以第三次推介佢！」推介原因？原來都係嗰句：「靠首都啦梗係！」楊小姐話其實鍾意新地（016）多啲，不過眼見紅磡海濱南岸「豪宅價」開售都獲預留幾百伙咁好成績，即刻支持新地同新世界（017）股價拾級而上，所以相信呢排地產市道仍然暢旺，「首都好快開賣，實掂啦！」黃敏碩反而話：「新地開始涉足內地，長實同和黃（013）上面夾埋有千幾億平方米土儲，新地最有能力追貼佢，所以爆發力可能更好。」不過黃敏碩補充，兩隻股佢都鍾意，「最緊要你知咩原因支持自己揀邊隻股就得啦！」
財險（2328）
升得番唔想蝕住走
網友大埔股神分別喺6.5同11蚊入咗財險（2328），回顧佢今個禮拜二曾經貼過呢隻股，當時黃敏碩同孫柏文都唔多睇好，黃敏碩叫股神不如換馬中國人壽（2628）仲好，股神噚日話：「之前俾你兩位嚇一嚇，本來想走㗎啦，但係走唔甩。」原來，股神唔想蝕住走，佢話：「噚日最高見過11.1，無理由走㗎﹗（昨收10.66元）」黃敏碩話：「加息對佢影響不壞，佢有好多定息項目，有存款項目，加息後，佢呢方面嘅收益會多咗。」不過，財險比其他兩隻保險股，明顯走勢較弱，黃敏碩唔睇好此股：「好多股民喺16蚊買落嚟，重重蟹貨。」
-大埔股神個案-
買入價：$6.5及$11
目標價：$15
止蝕價：$8
時間：─
專家回應：技術走勢轉差，一浪低於一浪，宜趁反彈減持
中石油（857）
溝貨不如入中海油
只有幾個月股齡嘅將軍澳陳小姐噚日打嚟求救，問手上兩隻蟹貨中石油（857）同埋建行（939）點處理好？佢11月頭喺17蚊入咗中石油，噚日收報13.84蚊，個零月跌咗一成八，見隻股跌咗咁多，問𠵱家溝貨值唔值博？而建行就喺7.7蚊買入，噚日收6.68蚊，唔見13%。
股海初哥 成手蟹貨
股海初哥陳小姐呻話：「買咗股兩三個月，除咗抽新股賺到啲之外，𠵱家手上嘅都係蟹貨！」黃敏碩安慰佢：「初初買股遇到跌市，其實可以當係一個經驗，唔一定係壞事。」黃敏碩認為，建行6蚊應可守穩，出年有機會上到8蚊樓上，「內地加存款準備金影響之前已經浮現，建行淨息差較闊，股本回報亦係內地銀行股中最強之一，前景相當唔錯，攻守皆宜，不過要留意建行A股嘅禁售期就嚟屆滿，短期可能會有沽壓。」
至於中石油短期走勢就認真麻麻，孫柏文話隻股太多不明朗因素，好難再令人「神話式」追買。黃敏碩好同意咁話：「行業前景冇以前咁易行，資源稅、暴利稅都會影響公司盈利，𠵱家買石油股都要定止蝕，唔再係『有買貴冇買錯』。」
黃敏碩建議，陳小姐與其溝貨，倒不如換馬去中海油（883）仲值博，因為後者仲未發A股，有消息時，升起上嚟爆發力會仲大。
