今時今日，人類也許無法坐定定聽古仔，學校老師教書要多媒體，網頁裝少個Flash略嫌失禮，即使結婚，靚人靚景美酒佳餚只係基本動作，最好有埋Video，方為Wedding新態度。
乜嘢叫Video？日頭行禮下午Clip片晚間剪接重溫，舊橋！近年不少新人喜歡花錢拍Pre-weddingMovie間場，述說戀愛心迹、或純粹搞笑，最過癮係自己做埋男女主角，成隊Crew有埋燈光音效陪你慢慢玩，埋單萬鬆啲銀，好過班人腳拍DV剪餐死。
最緊要係，阿媽，我做到男/女主角呀！呢句對白，一生人點都要講一次。
記者：劉嘉蕙
攝影：黃子偉、林栢鈞
動畫版
九鐵版甜蜜蜜 Karen&Michael
做資料搜集，老闆推銷功力一流，「呢個卡通，個新郎真人係200磅肥仔！我哋畫到佢瘦晒！」電影，真係夢工場。
見真人，男主角Michael原來唔肥，與老婆Karen是年輕夫婦，5年前邂逅於中大工商管理系迎新營，後來在影印房相遇，男方鼓起勇氣向女方要ICQ，就此撻着。畢業後，Michael因工作關係經常奔走大陸，小情侶一星期只見一次，索性快手結婚，大家有個承諾。
年輕夫婦結婚，諗頭特別多，Michael曾到馬來西亞參加友人婚禮，看過一段動畫片覺得有趣，搞自己婚禮，希望照辦煮碗，畀多少少錢冇所謂，「一生人結一次婚，當然想特別啲，等人客記得，自己又多個回憶。最難得阿爸阿媽好支持，搞婚禮、影相、拍片，前後花差不多十萬，起初都肉赤，但阿媽話，呢種回憶日後多多錢都買唔番，所以寧願Honeymoon慳少少，都整條靚片留念。」Michael說。
公仔郁動似「飄移」
Michael及Karen的戀愛動畫長約3分鐘，以彭羚歌曲《小玩意》襯底，講述二人相戀經過，片中有末代九鐵畫面，Karen在九龍塘站哭別Michael，可堪日後玩集體回憶時回味。回想製作過程，Michael攞住友人卡通Demo四圍撲，以為好容易做，結果行足幾間婚禮攝錄公司，只有Zenith一間肯做。第一次做卡通，雙方都力求完美，全片有18個場景、男女主角造型多次更改，劇本再三斟酌，搞足個半月，花約兩萬。記者睇過條片，以業餘計，畫面質素不俗，人物造型全手工畫，公仔郁動好似「飄移」，手腳生硬，不過整體感覺相當窩心，平玩動畫算係咁啦！「效果我畀80分，始終大家經驗有限，我自己個人喜歡Cutie啲，佢哋畫法比較唯美，不過時間趕急冇辦法。」Michael說，轉頭又搭Karen膊頭，訪問一個鐘，夫婦二人不時對望冧笑，Sweet死！
中大是我們相識相愛的場地
無奈工作讓我們分離，火車一路向北
與其朝思暮想坐立難安，不如……
Wouldyoumarryme?
真人版
迷失東京之台北Remix Doris&Ben
拍拖17年，結婚半年有多的Ben及Doris有少少怕醜，笑言當日拍結婚片，是因為Aperture的老闆落嘴頭，回想甚為「戇居」，「其實一開始係去台灣影結婚相，去4日3夜，順便花半個下午拍埋條片，當時台北捷運人來人往，我哋又有NG，都幾尷尬，好彩地鐵入車廂Shot一Take過，唔係要搭多幾次。婚禮當晚播片，所有朋友呆晒！」
他們的電影，完全BasedonTrueStory，記載10年前二人「迷失東京」的經過，話說二人正乘搭JR往HelloKittyLand，Ben帶住Doris全副身家財產，唔覺意腳快快上咗車，Doris追唔切，只好聽Ben做口形話「下站等」。點知Ben原來搭上架「不停站列車」，趕搭下班車的Doris去到下一站，行出月台，見唔到Ben，點算好呢？
應該Ben返轉頭定Doris繼續搭呢？
分開、再聚、不分離
Doris話，選擇將這個片段拍成電影，因為對佢哋好有意義，「可能人在異鄉，機票證件喺佢身上，更加令我感覺冇咗佢唔得。」片中以CloseUp加男女主角深情獨白，感情濃縮。製作單位事前花心思了解二人相戀經過，特地在片尾Key字「分開、再一起、永不分離」，表示二人兜兜轉轉終於搵得番大家，也映襯二人戀愛心路──他們十多歲時在往美國的機上相識，一見如故，雞啄唔斷十多小時，「我成世人最怕搭長途機，但係嗰一程過得特別快。」Doris說，之後二人保持通訊，第一次拍拖，冇幾耐就分手，經過離離合合，最終才走在一起，「細個唔識愛情，覺得只係PhysicalAttraction，人大咗先知道愛要付出，所以分開再復合，令我哋更認定對方。」Ben在婚禮錄影訪問中真情剖白。
我還記得那個冬天在日本，JR人來人往，你拖着我的手
但，轉個頭，哦，你不見了？我馬上慌了
隔着玻璃，被列車帶走的你，一直說：下站等下站等
卻原來，你上的是架不停站列車
我們確曾分手過，再一起，永不永不再分離
幕後魔術手 埋單2萬樓下
想學兩對新人拍精美Pre-wedding電影，價錢一般9千尾至2萬元不等，包創作製作剪接及特別效果，視乎劇本，片長約3-10分鐘，外景拍攝另計Crew錢。
戀愛Refresher
從事攝錄工作28年的Aperture老闆Ringo說，近年新人愛玩扮MV或電影片段，他就用電腦Capture分鏡，模擬場景。記者睇過部份作品，如光良《第一次》、周星馳《食神》，相似度6成。「好多Couple一拍成癮，試過有對新人拍完個跨時空宿世姻緣故事後，雙方各自再靜雞雞上嚟拍Surprise片送畀對方，我們兩邊瞞，婚禮當日一齊播，感動全場！」Ringo說新人拍Pre-wedding電影，自娛娛賓尚在其次，整個真人故事改編拍攝過程，正好Refresh二人戀愛感覺，「我們拍攝着重資料搜集，會要求新人講自己戀愛史，刺激戀愛思維。」
Aperture（24504743）
立體聲IDo
另邊廂，Zenith將心思落重後期製作，精製DVDMenu，印封套及簡介，甚至用三維科技，「非專業演員會有CameraShy，做太Dramatic的片效果未必好，寧願執靚鏡頭、做好聲效，譬如拍婚禮現場，我們會特地多錄一條聲，令短片更有現場感。」美術指導Herbert說。記者聽過，新人講IDo之聲真的「言猶在耳」，仲清楚過現場！Zenith收費不算便宜，老闆Raymond嘆，「港人結婚會花錢影相，但未算太重視Video，覺得花幾萬拍條片不值。另外好多人心急，要求幾天內做好，其實後期製作，要做得好一定要花時間。所以想拍結婚Movie要盡早Plan！」
Zenith（27805668）
