1.星期六5保頓vs伯明翰
波膽：2:1
信心指數：★★★
英超踏入聖誕同新年快車檔期，代表球季接近進行一半。總結過去4個月時間，樸茨茅夫、利物浦、熱刺、曼城同維拉5隊是比較難捉路，事關佢哋主客作賽的表現實在太大出入。
主場曾贏曼聯就知幾勁
講番今期心水，我就首度在專欄推介保頓贏波。保頓過去幾季的成功之處，在於佢哋死球戰術，可惜季初在李森美的執教下，完全唔見晒死球戰術的威力，這可能與李森美想改變球隊的打法，可惜未能成功；直至麥臣上任後，球隊終於重施故技，加上踢法上傾向硬朗防守。由12場波未試過入多過1球，到最近兩場比賽合共入6球，保頓的進步表現，相信球迷有目共睹。
隊長路蘭復出，坐鎮中場之後，頻頻後上取得「士哥」，而有離心的主力前鋒安歷卡為前途着想，必定踢出身價吸引買家，而佢哋在主場早前先有贏過曼聯的往績，球員應該清楚知道，要遠離護級漩渦必須把握主場機會全力搶分，今場對手又係剛排在佢哋前面的伯明翰，如全取3分的話，來回已經6分，對球隊前途有幾重要，相信唔需要再多講。
至於伯明翰近期賣盤不成，但對球隊運作應該冇影響，除非新班主經常參與球隊運作，否則球員只要跟番領隊的指示訓練同比賽，運作是沒有問題。
但呢隊阿伯近期演出則唔夠穩定，當中作客只係贏過兩場，其中一場是榜尾的打比郡，另一場是完場前神奇地射死熱刺，如單計作客表現實在唔值得球迷支持。從季內所見，伯明翰今季防守死球能力相對較弱，今次對住演出已有改善的保頓，應會是凶多吉少。
2.星期六3阿仙奴vs熱刺
波膽：2:0
信心指數：★★★
阿仙奴隨着法比加斯、希比同尹佩斯等主力復出，兵工廠的戰鬥力又再提升。值得一提的是，法米尼亦都傷癒復出，有呢位無名英雄在中場助攻助守，今次主場出戰作客兩連勝的熱刺，必捧表現穩定的兵工廠。
3.星期六4阿士東維拉vs曼城
波膽：2:1
信心指數：★★
曼城在周中聯賽盃被破「主場不敗身」，士氣難免受挫，加上聯賽8場作客僅贏一場，令我更認為要捧主場的維拉。維拉主場戰績只是贏5場輸4場，但輸給對手分別為阿仙奴、利物浦、曼聯同樸茨茅夫，今面對住同級的曼城，3分應穩袋。
4.星期六6富咸vs韋根
波膽：2:1
信心指數：★
身處聯賽尾5的富咸，如果今場在主場對韋根仍贏唔到波，那好有可能係領隊山齊士的告別戰，故主隊富咸肯定全力爭勝搶分；而韋根進攻重心希斯基又受傷，主隊後防小了個心腹大患，可說幫富咸一把。
5.星期六7利物浦vs樸茨茅夫
波膽：1:0
信心指數：★★
利物浦聯賽盃出局，但只派副選上陣，明顯志不在此。隊長謝拉特同費蘭度托利斯，反而叉足電在呢場聯賽搏殺。老樸經已有6場作客勝仗在手，是上季全季的總和，進步好大，但紅軍今季有「反彈專家」之稱，加上主場出擊，信多次!
6.星期六8米杜士堡vs韋斯咸
波膽：0:0
信心指數：★
韋斯咸今季「主弱客強」，之前作客車路士同布力般流浪都交出好水準，今場作客對米杜士堡是有條件繼續攞分。主隊的米杜士堡近排表現亦有好大進步，兩支半斤八両的球隊對碰，相信最後會各得1分。
7.星期六9雷丁vs新特蘭
波膽：3:1
信心指數：★
名副其實的護級大戰，唔識作客贏波可以話榜尾球隊的最大通病，新特蘭亦唔例外。雷丁今季在主場踢9場贏5場成績尚可接受，中堅辛高復出後，令後防更見穩固，理應可以全取3分。
8.星期日6曼聯vs愛華頓
波膽：2:0
信心指數：★
愛華頓表現越踢越好，可惜呢個時候遇上曼聯，只可以嘆句無奈。紅魔鬼上個星期擊敗利物浦，雖然好多人話佢地踢得唔好，但中前場球員實在幾「弗」，主場出戰應足夠攻陷「拖肥糖」的大門。
9.星期日8紐卡素vs打比郡
波膽：3:1
信心指數：★★★
紐卡素近期「行大運」，連續兩場最後一分鐘入波擊敗對手，連打兩支強心針，球員信心自然大增。雖然紐記今季一直踢唔起，但主場仍可5勝，3連勝應該無乜大問題，而奧雲亦有可能復出同球迷賀聖誕。
10.星期日25布力般流浪vs車路士
波膽：1:2
信心指數：★★
雙方都在周中聯賽盃出戰，結果布力般「夫添」出擊同阿仙奴踢足120分鐘，輸波兼輸體力，而車路士輕勝紅軍消耗不多，加上中前場班底夠厚，在伊活公園小勝絕唔成問題。
註：以5★為最高
「暢譚英超」周末推介（12月份）
主客和：星期六5保頓勝（1.83）@500
主客和2x1：星期六3阿仙奴勝（1.45）x星期日8紐卡素勝（1.3）@1,000
全日投注：1,500分
上次賺蝕：-400分
累計結餘：89,076分
規則：全季底分為100,000分，每次最多投注2,000分，以周二及周六見報貼士計。
譚拔士
5屆香港神射手，在效力南華及東方合共射入超過200球，被譽為歷來最佳外援中鋒；現於英國skybet任公關主任及足球博彩節目主持。
電郵：mailto:[email protected]