本星期初逛碟舖,真係一個「難」字!套套中中等等難落手,偷聽隔籬哥仔仲笑住講:「買老土怪成蟲套《火拼3》?我寧願𠝹爛張卡都唔攞嚟碌!《鐵三角》好呀,戲院睇極唔明,買返去要慢慢煲!」可幸好戲在後頭,Blu-ray《生化危機3:絕種生還者》星期四晚殺到。記者截稿上版時,老死飛輪嚟刀下留人:「安樂隻《色,戒》到咗,有BoxSet又平裝,仲難得係一刀不剪、原汁原味香港戲院版!」唉,今次真係人頭落地都對唔住湯唯囉!
記者、攝影:朱崇德
查詢:DVDPro(23326326)
本周Blu-ray期待作
《生化危機3:絕種生還者》可以話係Blu-rayFans期待之作,始終係荷李活一線大片,2007片齡又夠新,聲畫表現有一定保證,加埋佢話自己係同系列最後一集,點都要撐埋落去嘅。
故事大綱有啲似《活死人地帶》溝《28日後》,生化病毒已經感染全球,人類已經所剩無幾通街喪屍。前兩集嘅困獸鬥不再,今次玩鬼佬至愛嘅RoadTrip,揸住架怪物車邊搵食物補給,邊搵人類死剩種。今集女主角都係由米娜祖華域芝飾演愛麗絲,接上集佢經UMBRELLA生化改造成超能人,帶領住最後一班人類避走喪屍之圍攻;可惜UMBRELLA美國本部科學家認為,愛麗絲的血液係最後解屍毒的良方,並派出有腦兼行動迅速的加強版喪屍──SuperUndead向佢哋追捕!
HD睇喪屍穿崩喇!
論電影畫質,同一般喪屍片唔同,今次大量鏡頭玩日光日白、沙漠景,暗位少相對對畫質考驗位唔多。不過就係睇HD太清楚,有時留意喪屍眼袋位,會睇到有啲穿崩,加上二流「失驚無神」彈出式喪屍橋段翻炒再翻炒,只可以講句:「咁我驚囉!」
聲效表現就好好多,槍聲定位唔錯,幾有質感。尤其喜歡女主角把尼泊爾刀,切喪屍把聲好有入肉感,加埋畫面血腥大平賣同有肉塊,筆者係喪屍片Fans,都覺得應該係咁拍。據知今次Blu-ray單碟版《生化危機3:絕種生還者》($238)會有中文字幕,嚟緊仲有套3集全收錄嘅《ResidentEvilTrilogy》($555),相信Making會齊好多,係Fans嘅一定要等!