湯盈盈由12年前出道賣銷魂展姣功徘徊二三線的「狐狸小姐」，捱到05年《阿旺新傳》的「阿好」，成功摘下台慶女配角獎，發哥周潤發也豎起手指公大讚；以為成功洗底，怎料在《歲月風雲》裏又被安排演第三者勾引苗僑偉，第三者從無好下場，盈盈因此沮喪得要命，一度視為演藝生涯污點。
但盈盈還是等到了，在劇集《兩妻時代》中，成為歐陽震華的法定老婆，首次擔正做女主角，網友個個讚好。問她會否趁機「從良」？盈盈似毫不介意演壞女人，還怪叫道：「呢個只係一個角色（飾演第三者），whynot？」
或者時代不同了，你看陳法拉，越姣越受歡迎。狐狸小姐，也總有出頭天，只是遲了12年！ 撰文：吳佩思
●大婆VS狐狸小姐●
從前的狐狸小姐，經歷《阿旺新傳》的醜爆look洗禮，收起性感媚態盡斂，還吸納了不少小朋友fans。回想當年因做「師奶公敵」而遭一名女士當眾不禮貌對待，幸而《兩》劇為她賺回不少觀眾緣，盈盈說：「𠵱家行街，成日有師奶好熱情咁過嚟攬住我；去街市，會有人同我講：『做乜咁耐唔嚟呀？』」
勾人老公質問監製
時移世易，如今演第三者、狐狸精、二奶等角色才有上位之日，像被冠「姣精」之名的陳法拉，在《師奶兵團》中硬搶葉童老公郭政鴻，瞬即人氣急升，可是盈盈滿不在乎：「可能以前嘅觀眾比較保守，但𠵱家佢哋係好open嘅，我行嘅路，endup係變成『阿好』……我覺得我係做咗一個例子出嚟，畀觀眾睇到，原來我可以由第三者到做阿好，令人知道我都可以變好。」
辛辛苦苦經營了醜女阿好出來，可是接下來的《歲月風雲》再被派演第三者破壞苗僑偉和鄧萃雯的婚姻，令盈盈很不開心。「當時我諗，點解又要我做呢個角色呢？又要勾引人老公，我有質問監製，之後我睇番個效果又真係幾好。」
拍拖慘變搶人男友
盈盈不怕扮狐狸精，但卻頗抗拒被指狐狸精，特別是入行之初：「因為佢哋唔係講緊個劇，而係講緊我，仲有個女演員指住我個樣話我有狐狸精相！初初嚟香港嗰陣我已經拍緊拖，但啲人仍然會話我搶人哋男友。好彩𠵱家我識得提升自己嘅EQ，明白到係講緊個角色唔係我個人。」問可有想過物色「狐狸精」接班人？盈盈反應頗大的說：「呢個只係一個角色（飾演第三者），iamOKwithit！唔會有人用有色眼鏡睇我，我會繼續做，whynot？」
●主角VS二線●
嚴格來說，湯盈盈並非首次「坐正」成為人妻，多年前她曾與三哥苗僑偉飾演夫妻，可惜只出了一集便死了。
在《兩妻時代》中，盈盈再嘗做大婆滋味，弔詭是這個女主角原由郭羨妮飾演，可是與陶大宇一筆糊塗賬落得「狐妮」惡名，倒由慣演狐狸精的盈盈冷手執個熱煎堆初嚐女主角兼大婆滋味。
又喊又笑壓力極大
《兩》劇推出以來，網友有讚冇彈，盈盈笑道﹕「好多睇住我成長嘅朋友都畀咗好多意見我，我喺TVB個網站睇番啲網友反應，見到佢哋都好支持我。」
芳齡32歲的盈盈，95年選華姐入行，轉眼12年。如今才等到機會坐正，不禁令人嘆句「遲來的春天」，難怪當事人緊張，特別是劇中人情緒起伏頗大，盈盈說：「我個角色一日內可以又喊又笑，有次拍外景講我勁喊，之後即刻趕返入廠，扮到好靚咁返公司同Bobby鬧交，緊接又拍我哋好恩愛嘅場面，搞到情緒好似過山車咁，精神分裂，好彩Bobby幫我好多，教我點樣可以feelbetter。有一part我完全投入唔到嗰種情緒，成個人breakdown勁喊，Bobby就叫我唔好畀自己咁大壓力，叫我放鬆去做。」
跌回二線開心就得
嘗過當女主角的「甜頭」，在新劇《疑情別戀》中再跌回二線，盈盈卻看得開，她說：「我唔理二線三線乜乜乜，總之有得做就做，開心就得。主角身邊點都要有好多人，好似《兩妻時代》我個角色都需要好多姊妹，唔分二線三線。呢個係我嘅firstjob，而且成個廠由監製到PA都睇住我大，我好享受呢種teamwork生活。好少人可以enjoy自己份工，但我可以。」
