人行加息，但港股就當冇到，前晚花旗股市造好，好友一於好少理，趁市靜將指數砌上27626，升609點。
其實話好友好少理唔係好正確，因為呢啲事，普羅股民邊有膽掃上去，掃上去嘅都係大戶，唔係你點會入局？大家轉吓channel睇期指未平倉合約應該有啲嘢發現，睇前日嘅數字，轉倉活動應該已經七七八八，如果唔係，揸住大把喺手嘅淡友大戶又點會畀個市挾上嚟？不過，花旗嗰邊壞消息一籮籮，𠵱家話可以搞番掂都幾難搵人信。
博升5成
之前銀行唔掂，𠵱家連保險公司都唔掂，保險公司唔掂有乜問題？好多銀行搵呢啲保險公司做對冲，保險公司唔掂即係話有啲數要自己孭番，銀行有可能需要加大撇賬額，保險公司唔掂啱啱先開始，影響有幾大真係唔敢諗，呢幾日全球股市好似冇乜嘢，好可能只係櫥窗粉飾效應，踏入新一年可能即刻會見到風暴再刮。表面睇嚟，未來呢幾日細注炒賣仲係安全期，但係踏入1月就要小心啲嘞。
恒生C輪2258：恒生（011）昨收158.60元，升近4巴仙，升破10日線，仲有成交配合，有機會試170元，破位睇178元，可以番兜隻恒生C輪2258，隻輪昨收1.90元，槓桿率8.4倍（有效6倍），對冲值0.72，正股升上178元，2258應該唔會低過3.48元，就算升到170元，隻輪都有接近5成升幅，正股跌穿153元止蝕。