樂壇新人方皓玟及梁雨恩因工作關係經常碰面而成為好朋友，今年的聖誕節二人希望抽空品嚐聖誕大餐，並期望來年有機會與愛侶到外國度過一個白色聖誕。
曾於蘇格蘭留學的方皓玟（Charmaine）早已見過白色聖誕，不過這個記憶一點都不浪漫，因為她當年於聖誕節拒絕了一名男同學的追求。
拒收朱古力
Charmaine日前說：「本來一個白色聖誕係好sweet嘅，加上仲要有人喺呢啲節日向我示愛，個男仔送咗12份禮物畀我，不過啲禮物我都唔鍾意，有好多仲要係朱古力，最後我咪拒絕咗佢囉。」經歷過一個不浪漫的聖誕，Charmaine希望將來可以與男朋友再到蘇格蘭歡度一個溫馨的白色聖誕。
至於梁雨恩（Cathy）最想將來與男友到芬蘭的聖誕老人村及欣賞北極光，她說：「我覺得白色聖誕一定要同自己最愛嘅人一齊過，反而同成班朋友就好似冇咗嗰種氣氛。」
聖誕擦大餐
原來Cathy以往的聖誕節不是留在家中便是到朋友家開party，所以她期待有一年的聖誕可以衝出香港。雖然去外國歡度節日的願望暫時未能達成，但Charmaine與Cathy計劃完成工作後一同品嚐聖誕消夜大餐。
採訪：李珮洳 攝影：陳俊強
髮型：PatrickSo＠HH
服裝提供：MonalisaMarquee、breadnbutter
場地提供：海港城
