前日葉維義正式辭去新昌營造（404）董事一職，朱樹豪成為新任揸fit人，新昌係本港老字號建築股，喺港澳同內地承辦建設工程，本來係葉氏家族生意，家陣葉維義讓位，只係揸番約5%股份。
葉氏賣盤嘅原因眾說紛紜，有傳葉維義要專心搞好惠理集團（806），亦有傳佢對資產管理興趣大過建築業好多。
而今次易手，新昌有機會由建築股轉型為地產發展股，如果轉型成功，對新昌未來嘅發展都有利啲，最驚係中央又會有宏調政策出台，影響內地樓市啫，新昌股東要諗諗佢哋嘅前景。
拉攏王英偉做副主席
新主席朱樹豪本身亦係駿豪集團主席，駿豪主要從事綜合休閒業務，觀瀾湖高爾夫球會就係由佢哋經營。朱氏今年中先將王英偉拉攏到駿豪，王英偉之前係瑞安房地產嘅副主席，被傳過會「回巢」政府做問責局長，亦係一名人才。今次朱樹豪接手新昌亦預埋王英偉，王氏會出任執董兼副主席。葉維義祖業付託畀佢哋，應該可以安心。