球彩台宗旨就係同球迷開開心心睇波，而有睇我哋節目球迷應該都知道，主持間中會響節目中講笑或者互「窒」，球迷可能會因為咁而以為主持之間有乜心病，其實只係想搞氣氛，希望球迷可以睇得過癮。
每逢周末，球彩台直播8個小時（有時可能唔止），如果淨係好正經咁同球迷講場波同比賽賠率，球迷唔悶死，我哋成班主持都悶暈，所以節目夾雜不同元素，講波之餘，又會有即場賠率，亦會同球迷傾波經講心水，甚至為球迷打氣，務求令到節目熱熱鬧鬧。
互窒無損拍檔感情
由於主持之間早已有默契，可以喺節目中互「寸」對方，好在我哋都係玩得之人，就算節目裏面點「寸」點「窒」都好，只限於搞笑同營造氣氛，亦絕對唔會因為咁樣而影響到大家嘅感情。
講真，做咗球彩台咁多年，生活日夜顛倒，體力消耗大，身體難免差咗，但就做得開心同有唔少滿足感，因為有時出到街，球迷認到我，都會主動同我打個招呼兼問料；而最開心今夏喺大球場睇波，完場後畀大批球迷，當中有男球迷，亦有男球迷的女友或者老婆包圍影相留念，辛苦得嚟，又得到球迷認同，呢樣確實好值得自己開心。
文：阿鵬