恒豐金業（870）主席林世榮，繼中外知名嘅金廁所後，最新展品金老鼠已經放咗喺工展會入口，仲起咗個好意頭嘅朵，叫「招財進寶迎新歲」。佢話有老鼠嘅地方就有嘢食，寓意鼠年豐衣足食。
呢隻金老鼠就勁咯，身高1.5米，闊又係1.5米，重量足足有成50公斤，仲講到明用999.9千足純金打造，價值1380萬銀。行政總裁伍綺媚仲話，為咗呢隻金鼠個「鼠身安全」，專登請咗3個「實Q」哥哥輪流睇住。不過，隻金鼠都擺唔得好耐，春節過後，可能會「化身」為5000條金條（或金鏈）都唔定。
諗落都啱數喎，𠵱家金價升到嘭嘭聲，林世榮自己都話，明年第一季睇每盎司黃金見850至900美金，到時唔排除高價賣出兩至三噸「金展品」，好似金凳、金擺設等等，套現6億大銀，相信都有成3億盈利袋袋平安。
不過，鎮店之寶金廁所就肯定唔會賣喎，至於金觀音都唔會易手，因為佢自己拜觀音。至於明年金價勇創高峯過後，佢預言09年會開始下滑到每盎斯600美金水平。