南太電子（2633）噚日舉行咗特別股東大會，投票表決南太系重組議案，身為股東之一嘅股壇長毛DavidWebb，一早已經事先張揚會嚟踩場，仲晨早喺佢個blog度吹雞，叫啲小股東出嚟投反對票，否決南太電子向母公司南太集團收購資產，認為價錢唔係好合理，擺明跳上擂台挑戰有「電子大王」之稱嘅南太系老闆顧明均。
上兩個月阿Webb越級挑戰兩鐵合併失敗後，未有令呢位股壇長毛氣餒，今次再次出招，華華都好想知道佢成唔成功，所以朝早10點半就走去睇賽果……
喺點票期間，充滿自信嘅阿Webb走出嚟同華華講，如果真係革命成功，佢諗住增持南電，點知轉個頭抄低咗個投票結果後，就頭耷耷話：「WeLOSE！」仲要補多句「verydisappointed！」但就死都唔肯同華華講，會唔會失望到要賣晒手頭嗰啲南電股份。
查實今次投票，贊成同反對嘅票數百分比係57.37%對42.63%，勝負只係差嗰2000萬股左右，唔算太大，俾顧老闆以些微點數K.O.（knockout，意指擊倒）咗嘅阿Webb自然唔多忿氣，歸咎啲小股東平時唔鍾意出嚟投票，所以至輸少少。但華華都係嗰句，贏就贏，輸就輸，下次再努力過啦。
小股東話被人滋擾
講開又講，雖然南太系單重組刁最終都有驚無險順利過骨，但華華日前就收到一班自稱係前南太系僱員兼股票持有人嘅讀者爆料，話佢哋俾啲南太系員工滋擾，要求將投票權交畀公司，等個重組方案可以平平安安通過，華華當然唔會放過機會，問吓顧老闆有冇咁嘅事啦！
顧老闆聽到之後就對華華笑咗幾聲，話自己一直係以平常心處理重組嘅事，冇乜必要干擾佢哋點投，不過可能有個別同事「鼓勵」啲人嚟投票啫。
指揮棒偶有失靈
阿Webb支指揮棒唔係次次靈，最近兩次吹雞叫小股東投反對票嘅行動都失敗。好似今年10月尾，佢反對恒地（012）收購恒發（097）手上嘅中華煤氣（003）股份建議，呼籲要公開競投、價高者得方式出售，但最後有九成七嘅恒發小股東贊成出售煤氣，阿Webb咁就衰咗。而喺9月時，阿Webb反對兩鐵合併，擔心家陣已改名叫港鐵（066）嘅地鐵會減少派息，最後小股東以八成二大比數通過合併，小股東又冇聽阿Webb支笛。
阿Webb今年戰績：兩敗兩勝
日期：31/10
事件：反對恒地收購恒發手上煤氣股份，建議公開競投
結果：失敗
日期：12/09
事件：反對兩鐵合併，擔心地鐵會減少派息
結果：失敗
日期：05/06
事件：反對大股東提出王氏港建私有化建議，指出價太低
結果：成功
日期：20/03
事件：反對中海油的存款服務關連交易，有損小股東利益
結果：成功
贏過中海油王氏港建
股壇長毛阿Webb有幾辣，唔少上市公司大股東都領教過。6月時王氏港建（532）嘅大股東王忠桐，提出第二度私有化王氏港建，當時揸住3.16巴仙股權嘅阿Webb就表明反對，話王主席打算以每股1.65蚊私有化王氏港建，實在太搵笨，對小股東冇着數，佢話每股至少值3.45蚊。結果係點，私有化梗係noway啦，表決當日，有52個巴仙小股東投票反對，反對票遠超過阿Webb持有嘅股數，睇吓阿Webb幾有號召力。
至於另一單，就發生喺今年4月初，阿Webb帶住班小股東，揮低傅成玉，否決中海油（883）提出嘅關連交易。話說中海油建議將公司資金，存入姊妹公司中海油財務，俾阿Webb批評損害小股東利益，最後無獨有偶，有52個巴仙小股東投反對票，推翻中海油動議。
電郵：mailto:[email protected]
