「入波真爽！入口更爽！廣西金嗓子！」——呢句對白來自新鮮出爐世界足球先生卡卡為大陸喉糖拍嘅廣告。隨住卡卡囊括所有個人大獎，呢間公司嘅知名度肯定大增，但卡卡同舊年廣告主角朗拿度一樣，笑得好儍，不過儍人有儍福，話唔定「粉絲」更鍾意。
講開呢個廣告都有段古，話說上手廣告嘅主角朗拿度，最終要控告個廣告拍得太「白癡」，最後不了了之。我求大俠兩個廣告都睇過，基本上冇分別，卡卡笑起來同肥哨一樣儍吓儍吓，不過以佢咁好仔，應該唔會告個廣告影響個人形象啩！
爬牆入試場少年瘀事
最近喜事重重嘅卡卡一向好識得保護私隱，不過細佬廸加奧就唔醒目，居然出來爆大佬當年醜事。佢話卡卡讀書時一次考試遲大到，監考官係都唔畀佢入去，最後呢位乖乖仔居然爬牆入試場，由於當時好多考生冇考試，結果不但得逞仲pass埋㖭！
大家咪睇卡卡場上醒到飛起，細個居然俾細佬偷食朱古力都唔知。話說一年復活節，好鍾意食朱古力嘅廸加奧，口快快食晒自己嗰份後，偷偷將大佬嗰份都食埋，仲蠱惑到將糖紙包番好；卡卡事後發爛渣，廸加奧就作古仔話：「呢粒復活節當日你自己食㗎喎！」
另外，巴西傳媒亦踢爆佢老婆卡露蓮並非卡卡嘅初戀，而係巴西模特兒伊麗莎白，不過對方頂唔順拍拖成日有球迷攞簽名，於是相識5個月就分手。聽講卡卡同卡露蓮結婚前，平均一周收到150封求愛信件，可見做得卡卡另一半，少啲自信都唔得！
今年肯定係卡卡最風光嘅一年，不過佢亦應該感受到做「宇宙最強」背後嘅代價；相信日後會有越來越多有關佢嘅八卦新聞，希望呢對恩愛小夫妻可以情比金堅，打風都打唔甩啦！
廣告片段：
http://www.youtube.com/watch?v=jMpaaH8eTJE