國際米蘭球星阿祖安奴兩個月前返巴西跟聖保羅操練，周三仲證實將以借用形式效力該會6個月，我求大俠即時衝入《環球報》網站，果然見到久違嘅「笑口祖」。
從操練片段所見，「笑口祖」fit到老虎都打死幾隻，一個左腳抽射、兩個頭槌攻門都係嘭嘭聲，呢個邊似國米嗰個腳步浮浮嘅阿祖安奴啊？講到呢次轉會，阿祖忍住唔笑咁講：「從第一日來到聖保羅，所有人都對我好好，我會努力表現自己，重返巴西國家隊。」
聖保羅借用6個月
呢次阿祖成功加盟聖保羅，係繼列基美重返小保加後，第2位重量級球星回歸南美洲球壇，嚟緊南美自由盃大有睇頭！最高興嘅仲有國米，因為有傳聖保羅將承擔阿祖昂貴嘅人工之餘，如果第日有大球會睇中，仲可以乘機拋甩呢隻「毫子股」，真係一舉幾得㗎！
對於近兩季巴甲聯冠軍嘅聖保羅來講，阿祖嘅加盟亦大幅提升球隊實力，如虎添翼，而6個月嘅借用期亦正好可以打晒成個南美自由盃，可見該隊對重奪呢個失落兩年嘅南美球會最高榮譽，係志在必得。咁啱阿祖又從未攞過呢隻盃，鬥心、戰意都唔使懷疑喇！
講真呢個「笑口祖」都係天才一名，可惜私生活太爛而早殘，以佢呢隻爛泥個性都係啱南美多啲，講紀律嘅歐洲球壇都係唔啱佢。講時講，國米亦有大把新星取代佢，好似周三意大利盃8強4:1大勝里賈納，在場就有比利、巴洛廸利等之前聽到未聽過嘅新仔，可見球壇新陳代謝快到幾得人驚呢！
阿祖最新片段： http://globoesporte.globo.com/ESP/Noticia/Futebol/Campeonatos/0 ,,MUL233394-4840,00.html