有線球彩台主持之一的陳樹鵬（阿鵬），憑草根及生鬼形象，加上擅於搞氣氛，成為球彩台人氣主持。對於成功「入屋」，他說：「其實識我嘅人都知我鍾意講嘢，節目上只係做番自己，搞氣氛務求大家開心睇波。」
之十七
記者：曾雁平
攝影：王子俊
原先任足球網站編輯的阿鵬，因喜歡睇波，且擅長「吹水」，04年其好友「盤神」知道有線籌組首個足彩節目，便推薦平時口若懸河的「阿鵬」到有線試鏡，同年8月正式成為球彩台其中一位主持。由於阿鵬在節目內表情及動作多多，講嘢夠生鬼，又經常幫球員改「花名」（當中最著名是幫當時效力車路士的前鋒基斯文改「文仔」），結果甚得觀眾球迷歡心。
乜都可以講一餐
訪問前，有線外事部大員已提醒，阿鵬很喜歡「吹水」，甚麼也可以「講一餐」，縱使訪問前已有備而來，怎知還是被帶到離題萬丈。像他可以在訪問時，不知為何能將話題帶到1位由細識到大、現全職買股的朋友，如何憑國企股致富；之後講到早前客串拍攝有線劇集《補習天后》時，被劇中女角的氣燄嚇壞；後來又講到他近來很喜歡玩高級音響，每日做完節目，無論幾倦也要聽番幾首靚歌才入睡。
認真搵料畀貼士
「初做主持最難並不是講嘢，反而最難是面對鏡頭，好多時都望錯鏡頭，搞到要揸機嘅哥哥要同我打手勢至搵啱部機。自己喺節目度其實冇乜特別設計做主持嘅風格，主要做番自己，識我嘅人都知我鍾意玩同熱鬧，做節目可能因為咁而得到認同。」阿鵬說。
阿鵬在早期的球彩台節目因口沒遮攔，既狂寸兩位女主持Rita及其緋聞女友Wendy唔識波，還不時講些語帶相關的有味笑話，有傳因此而接到球彩台高層的口頭警告，故近兩年阿鵬在節目中明顯比以往收斂，當中最明顯是減少了講「笑話」，但他否認收斂之說：「記憶中好似冇老細（高層）叫我收斂啲，我亦唔覺得自已做節目嘅風格有乜改變，可能因為節目時間長，到後段體力下降，個腦轉數減慢，才令大家以為我收斂。」
經常被球迷問料的阿鵬坦言，在節目或報章所提供的心水冇話包中，但自問是做足功課：「我每日都花幾個鐘頭上網搵料同做足盤路分析，至於準唔準則好難講，信嘅球迷可以跟番少少，好在打電話入嚟嘅球迷都相當理性，好少話埋怨我哋啲貼士唔準，最多打嚟取笑呢排做『燈』。」
阿鵬(圖左)
全名：陳樹鵬
年齡：33歲
身高：1米75
體重：80公斤（近期重咗）
現職：有線球彩台主持
最喜歡球隊：利物浦
最喜歡球星：馬勒當拿、華度
球員別名傑作
阿鵬講波愛為球員改別名，別名主要從球員樣貌而來，有的相似，有的食「字」，勝在夠抵死啜核，深得觀眾心。
球員：美斯
別名：張家輝
球員：古利
別名：冼毅力
球員：卡斯拿斯
別名：陳錦鴻
球員：賓艾化
別名：賓硬化
球員：甘莫蘭尼斯
別名：陳欣健
球員：列貝利
別名：刀疤仔
講波的一天(17/12)
時間：12:00pm
內容：起床
時間：1:00pm
內容：回有線為世冠盃《好友派對》進行綵排
時間：3:00pm
內容：化妝
時間：5:45pm
內容：節目開始
時間：9:00pm
內容：節目結束
時間：9:30pm
內容：《快樂星期天》，直播阿特蘭大對巴勒莫
時間：2:15am
內容：節目結束
時間：3:00am
內容：拍攝天皇盃宣傳廣告
時間：5:00am
內容：拍攝結束，起程回家
球彩台爆笑經典作
阿鵬與另外兩位球彩台主持強尼和阿聲，年前在節目中討論某航空公司首航班機延誤起飛時間的事件時，對女主持Rita大講有味笑話，堪稱阿鵬有份參與的球彩台節目經典時刻之一。
http://www.youtube.com/watch?v=W-8uAzMNyMU
網友有Say
agogock：我幾喜歡球彩台嘅氣氛，尤其是阿鵬，班主持支持邊隊，照講，着晒自己撐嗰隊嘅波衫，如果有家庭觀眾打入黎，點都會話『幫你打打氣』，觀眾問料，好快已經覆到，旁述又夠鬼馬。
BelBel：最鍾意球彩台班主持做︰阿鵬、阿占、張國強(KK)、Rita和依雯等。講真如果呢個show無咗阿鵬和KK，咁一定無咁好玩。成個球彩台最叻搞氣氛始終都係佢兩個。
JanLau：一路聽住阿鵬佢哋係度搞笑，一路聽比數可以一直睇到兩點都唔會悶！