旺角網友陳小姐噚日好雀躍打嚟推介半新股中國中鐵（390），仲話啱啱以8.8蚊入咗貨，短炒睇升14%，目標價10蚊。原來陳小姐入貨前做足功課，睇足多個財經新聞台，推介中鐵原因，「聽日中鐵會被納入MSCI環球標準指數成份股，入得大摩指數，中鐵股價有機會被炒高，咪趁機入貨。」
H股曾破$9 A股漲停板
中鐵噚日大發神威，股價越升越有，一度衝破9蚊大關，急升10.3%，最後收報8.96蚊，升幅9.5%，成交額有成43.6億銀；至於內地中鐵A股表現就更加犀利，股價急升一成至漲停板，收報9.97蚊人仔。
荷蘭銀行私人投資產品部副董事何啓聰就話：「睇番過去晉身指數成份股嘅股票，好似中石油（857）入藍籌，對短期股價係有一定刺激，出現指數相關買盤，令中石油當時跑贏大市，但中長線走勢，一定要睇番公司估值同埋前景。」
孫柏文問：「陳小姐，你知唔知指數公司，點樣揀指數成份股？」陳小姐：「都唔明㗎！咁先至打電話入嚟問吓專家。」何啓聰即時解畫：「上市公司點先至有機會納入指數成份股，要睇市值同行業獨特性，一般嚟講，基金經理希望指數可以充份反映各個行業。」
陳小姐補充：「以中鐵嘅股價升幅走勢圖嚟睇，原本諗住將目標價定喺10.44蚊，不過都係唔好咁大貪，咪set低啲個目標價，定喺10蚊囉。」孫柏文就話：「陳小姐炒入指數成份股嘅策略係啱嘅，但一定要定好止蝕價，建議將止蝕定喺被炒上前嘅8.2蚊位置，會較為穩陣，一跌穿8.2蚊，反映股價缺乏上升動力，咁就要先走貨，記住要堅守止蝕價。」
通過京滬鐵路資格預審
事實上，中鐵另有利好消息支撐股價節節上升。據內地報章報道，京滬高速鐵路的資格預審已有結果。消息人士指，通過資格審查的共有17間公司，包括中鐵旗下中鐵二局等6間公司，以及中交建（1800）等，相信中鐵有望分享京滬鐵路的盛宴；至於競標結果將於明年初公佈。
《旺角陳小姐個案》
‧買入價：$8.8
‧目標價：$10
‧止蝕價：—
‧時間：—
中材股份（1893）
等橫行吓再吸
美孚網友陳太推介噚日新登場嘅新股中材股份（1893），想問吓邊個價位可以入貨，「近排內地金融股表現較𣲷，估計嚟緊建材同基建股嘅走勢會較好。」講真，中材噚日表現相當凌厲，一開市就高開38%，股價最高升近42%，收報6.07蚊，升咗35%，係近期表現比較令人安慰嘅新股。
中資金融股 蟹咗唔使怕
何啓聰話：「中材嘅質素唔太差，內地唔少人都識呢間公司，前景唔錯，未來會有唔少基建同建築定單，但𠵱家佢嘅市盈率，已經追近其他水泥股，好似海螺水泥（914），估計短時間股價再升空間唔大。」佢建議陳太唔使咁心急入貨，「睇多幾日，等股票橫行一段時間再吸納，但記住一定要set好止蝕價。」
陳太亦提到，自己持有唔少大陸金融股蟹貨，何啓聰就話：「暫時都唔使太擔心，內地金融股已有見底迹象。」
中石油（857）
有機會返家鄉
噚日有兩個網友都打嚟話早前入咗中石油（857），𠵱家想搵人指點吓迷津。將軍澳陳小姐11月初喺17蚊買入，炮台山郭先生就喺16蚊左右入貨，何啓聰話：「入呢隻股，要有心理準備，可能要捱一段時間先上番個價位。」佢補充，中石油16蚊以上或者有啲阻力，不過基本因素唔錯，有機會「返家鄉」。
郭先生又問：「李兆基話出年秋季恒指見三萬三，陸東又話四萬二，你哋又睇幾多點？」孫柏文話：「我就睇淡啲，𠵱家個市不明朗因素太多，驚中伏，一陣美國有主要大銀行出事，或者英國唔知咩又出事，啲人一驚就掟貨出嚟，所以落番二萬三絕對有機會。」
《將軍澳陳小姐個案》
買入價：$17
目標價：$18
止蝕價：—
時間：1個月
《炮台山郭先生個案》
買入價：$16
目標價：─
止蝕價：─
時間：1個月
新銀集團（988）
復牌後跌眼鏡
將軍澳馮先生幾個月前買咗隻新銀集團（988），佢話：「我喺兩個六有買，兩個半又溝咗啲。」馮先生知道新銀為咗收購，曾經以兩個半配股，所以先再度入市，「我睇好佢收購後盈利會大增，因為佢收購嗰兩樣嘢，一個係焦煤，另一個係冶金。」
令馮先生覺得奇怪嘅係，點解配股後股價表現反而仲差，復牌後更加大跌眼鏡。新銀前日宣佈24億買洗煤及焦炭廠，復牌後股價曾高見2.59蚊，但後勁不繼，噚日一度低見1.85元，最後收2蚊，跌4%，仲低過停牌前收市價2.22蚊。
何啓聰話：「其實要睇番配股批貨size有幾大，或者人哋係一個比較長線嘅投資者。配股過程可能涉及可換股票據嘅交易，所以唔可以用呢個價做參考，唔應該回軟時溝淡，如果你真係睇好，建議你揸吓先。」
《馮先生個案》
買入價：$2.6
目標價：—
止蝕價：—
時間：3個月
今日嘉賓：亨達集團研究部董事黃敏碩
歡迎Phonein28698262
http://appleactionews.com/features/finance/
想搵名家教路，請登入以下網址
http://appledaily.atnext.com/jp/finance
登記成功參與節目者，有機會獲贈禮品
*下午3時半開始，優先接受登記
