噚日煤炭股升勢凌厲，西貢網友黃先生推介中國神華（1088），建議43蚊入市，揸3個月，目標價50蚊，睇升16%，止蝕價38蚊。中國神華噚日喺45蚊位浮游，股價最高升過1.7%，收報45蚊，升幅收窄至只有0.2%。
業務全面 覓收購搞環保
黃先生非常睇好內地煤炭龍頭股嘅中國神華，唔擔心大陸宏調對資源股會造成影響，「近幾日，煤炭商同電廠傾掂咗電煤價格，加幅幾犀利，而市場又預測明年大陸經濟可以保持10%增長，估計對資源、能源仍有好強嘅需求，相信嚟緊中國神華公佈嘅業績應該唔錯，加上佢哋又進行海外收購，擴大業務，覺得可以喺𠵱家股市人心惶惶、個個睇淡內地能源股之際，趁機入貨。」
亨達集團研究部董事黃敏碩都認同黃先生嘅分析，「喺眾多煤炭股當中，最睇好中國神華，佢煤炭生產量同存量係全國『冧巴One』，最受惠電煤價格上升，加上進行海外收購，物色蒙古同印尼嘅煤礦，業務又全面，經營上中下游業務，為咗迎合環保節能潮流，又搞煤化工。」
雖然近日中國神華嘅股價反彈唔及中煤能源（1898）同兗州煤業（1171），但睇番業務嘅全面性，黃敏碩認為神華可以放心吸納，係少數可以形容為「有買貴冇買錯」嘅資源股。
四叔撐住唔怕被人掟貨
黃先生仲話：「股神四叔（李兆基）都係中國神華其中一個股東，話到明會揸住唔放，咁就唔使太擔心有人掟貨，如果好似李超人咁，係咁掟中資股，咁我就慘囉！」孫柏文補充：「睇番中國神華嘅股價走勢圖，以陰陽燭分析，喺40蚊嘅價位非常硬淨，如果跌穿40蚊，不妨考慮先行走貨，建議上調38蚊嘅止蝕價。」
獨愛中煤短炒爆炸力強
九龍塘網友楊小姐推介另一隻煤炭股中煤能源，話自己曾多次短炒獲利，認為可以喺現價22.7蚊入貨，目標價27蚊，揸3個月，升值潛力19%。中煤能源噚日股價最高曾急升6.4%，收報22.7蚊，上升3.4%。
楊小姐推介原因，「都係因為電煤價格上升，同埋喺冬天，大陸唔少人都會燒煤取暖，估計會增加煤炭需求，更有助推高煤價。」中煤能源嘅股價由10月嘅歷史高位，已下跌超過兩成，楊小姐相信現時係吸納時機。
炒回歸A股 憧憬注資
黃敏碩好奇問：「有咁多煤炭股可以選擇，點解情有獨鍾中煤？唔揀中國神華？」楊小姐解釋：「因為中煤能源仲有注資概念，又可以炒埋A股上市，估計股價嘅爆升潛力，會比中國神華更強。」
黃敏碩亦表示：「雖然中煤嘅市盈率較貴，但講到短炒爆炸力，好明顯強過神華，如果注資真係落實，令NAV（資產淨值）增加，加埋發A股刺激，股價有機會力爭上游，明年有機會上到26、27蚊。」
交通銀行（3328）
想溝淡 不如換馬
美孚陳太噚日話，早幾排聽到滙控（005）增持交通銀行（3328），於是喺14.4蚊「摸頂」入咗交行，不過之後越跌越有，家吓連11蚊都失守埋，想喺現價增持「溝淡佢」。
黃敏碩教路，交行噚日收10.76蚊都可以考慮，如有耐性，不妨再等一等，等股價喘定後再入市都唔遲。不過，佢個人近期就睇好工行（1398）同建行（939）多啲，因為喺宏調下，存款準備金率已升到歷史高位，內地銀行始終會受影響，但對存款較高嘅工行同埋建行嘅影響則相對較小；加上佢哋市值大，亦有指數成份股效應，建議陳太與其「溝貨」，不如轉買後者。
-陳太個案-
買入價：$14.4
目標價：$16
止蝕價：—
時間：1個月
專家回應：高追後撈貨，宜低位追入，或考慮轉吼建行（939）
中國人壽（2628）
跌穿$40 好似幾抵
旺角麥小姐前日用39.34蚊入咗中國人壽（2628），無諗過止蝕價，入貨只係因為見佢成日徘徊喺40幾蚊，跌穿40蚊好似幾抵！黃敏碩分析番個處境：「國壽近期走勢相對另外兩隻中資保險股已算唔錯，財險（2328）更加跌到散晒㖭。國壽頭11個月嘅保費增長都算交到功課，又可以藉QDII走出去嘞，可以分散佢集中投資A股嘅情況，而且農村保險業務都應該仲有增長空間。」不過，黃敏碩不忘提醒麥小姐要做好兩手準備：「國壽𠵱家喺呢啲位都算有支持，你入貨位都唔算差；不過如果大市再試低位，國壽可能會落番35蚊，set定止蝕都未嘗不可。」
-麥小姐個案-
買入價：$39.34
目標價：—
止蝕價：—
時間：—
專家回應：不利因素已從股價反映，宜分注上車，及定止蝕位
安踏體育（2020）
睇遠啲 炒世博概念
將軍澳Michael打嚟先哭股喪：「早幾日叫人沽期指，點知一沽即升。」黃敏碩認為：「大家覺得100天線暫時可以守番穩，假期前政策消息又少番啲，好多期指轉倉合約已經轉戰下個月，倒不如睇下個月嘅方向先再做嘢。」Michael轉而建議買安踏體育（2020），睇好佢有奧運概念。Michael話：「都驚炒遲咗，所以set個目標價低啲。」黃敏碩話：「我都唔贊成純炒奧運概念，如果要炒，不如炒遠啲，炒世博概念。」黃敏碩認為，奧運概念已反映喺股價上，不過值得留意嘅係，安踏喺零售及品牌上有優勢。
-Michael建議-
建議
買入價：$9.5
目標價：$12
止蝕價：—
時間：3個月
專家回應：預期盈利複合增長率仍強勁，部份業務具稅務優惠效益，惟短期估值不低，止蝕可設在$8.5
今日嘉賓：荷蘭銀行私人投資產品部副董事何啓聰
歡迎Phonein28698262
http://appleactionews.com/features/finance/
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
*下午3時半開始，優先接受登記
