【本報訊】大角嘴一個經常爭吵四口之家，昨凌晨發生家庭暴力事件。該一家四口包括56歲姓秦父親、45歲姓朱母親、15歲長子軒仔及14歲幼女，同住福全街福興大廈一單位。
軒仔去年因在網吧打人，被警方拘捕以警司警誡，並要接受社工輔導。他原本就讀中四，但無心向學一星期前輟學到快餐店工作，令望子成龍父母大為不滿。
前晚9時許，軒仔下班回家後上網與友人傾談，至昨凌晨1時許父親着他關機睡覺，他未有理會引起父親不滿將電線拔掉，兩父子激烈爭吵父親被人推撞。母親見狀不忿軒仔所為，隨手拾起一個膠水樽及一支一米長鋁通作武器，三人扭作一團。混亂中軒仔受輕傷，手部更被咬了一口；母親眼部擦損；父親制止兩人時胸口不適，三人混戰嚇得14歲妹妹報警求助。
不滿父母偏愛妹妹
警員到場將輕傷三人送院敷治，軒仔及母親涉嫌傷人同惹官非被捕，帶署後准保釋候查。軒仔表示對事件感到無奈：「我都冇錯唔會認，今次係家事希望社工可以幫手和解囉！」
「我自細同爸爸媽媽關係都好疏離，細妹讀書好叻我就好差，佢哋成日話我打機唔讀書，我係讀唔上去，想出嚟打工或者讀其他嘢，佢哋都唔明我點諗。」軒仔坦言不滿父母偏愛妹妹。
香港青年協會督導主任李炎昌指出，事件癥結在於雙方未有嘗試了解及接納對方想法：「阿仔可以試吓體諒父母嘅要求係為佢好嘅，父母試吓接受阿仔讀書唔叻但有其他長處，公平對待兩兄妹，令哥哥少啲唔開心同反叛，一人讓一啲，可以改善彼此關係。」