招商局噚日喺香港舉行成立135周年酒會，現場派發嘅紀念特刊原來有古仔睇，講佢哋公司招牌口號「時間就是金錢，效率就是生命」，同鄧小平嘅一段關係。
話說79年先受命出任招商局第29代掌門人嘅袁庚，諗住利用香港資本主義體制下嘅論功行賞，催谷內地工人嘅效率，事緣當年招商局喺蛇口港開工嘅泥頭車，每日每輛只運載20至30轉泥，袁庚喺80年就實行一個新措施，每架車只要超額走多幾轉，都有額外4分錢獎賞，即時令每架泥頭車增加到每日走80至90轉泥，效率增兩三倍。
不過，呢個做法招來閒言閒語，話「袁庚要錢又要命，比資本家還狠」「蛇口宣揚拜金主義」；最後要由中國改革開放總設計師鄧小平出面擺平，鄧小平話：「深圳嘅建設速度相當快…深圳蛇口工業區更快…他們的口號是時間就是金錢，效率就是生命。」