滙豐（005）董事局通過下年加薪建議，班員工過聖誕買嘢都疏爽啲，而班高層亦好識做，特登搞咗個「創意黑色聖誕夜」酒會，贈吓興之餘，仲可以與眾同樂，招待300幾個工商客戶。
點樣先叫創意？原來係用咗最潮嘅黑色物料，將員工餐廳改裝成時尚大廳；安排嘅表演仲好精采，着晒一身侍應打扮嘅歌手，穿插喺幾百位來賓之間搞氣氛，可能大家都知滙豐下年有得加人工，成個酒會氣氛都幾熱鬧，睇吓幾多人爭住要同滙豐總經理梁高美懿影相就知喇。
講起滙豐，由出年1月1日開始，衛哲會成為滙豐銀行嘅非執行董事。
衛哲係邊個？咪就係一上市股價炒到飛起嘅阿里巴巴（1688）行政總裁兼執行董事，佢喺06年尾加入阿里巴巴，亦曾經喺百安居（B&Q）做過中國區總裁，對上一次擔任同銀行有關職務已經係98年東方證券嘅事。滙豐搵衛哲幫手，有可能係睇中佢喺阿里巴巴搞到有聲有色，想佢幫隻大笨象行快兩步。