一度絕迹香港嘅美國漢堡包連鎖店BurgerKing，近年重返香港都只開喺唔多就腳嘅地方，噚日終於重臨市中心，揀咗喺尖沙嘴太陽廣場內，仲一反以往低調作風，搞個開幕禮有聲有勢，最意外係竟然俾華華見到新地（016）郭炳聯、剛退任九鐵主席田北辰，同埋其士（025）周維正撐場，邊個咁勁請到咁多名人到場呢？
呢次BurgerKing回歸市區大展拳腳，係由北亞策略（8080）策劃，佢哋旗下健味堡攞到BurgerKing香港同澳門嘅獨家發展權，而北亞策略高層之一曾國泰絕對係有份量之士，佢做過高盛亞洲主席，人脈關係甚強，噚日出席開幕禮嘅賓客，好多都係畀面佢。
做得賓客嘅郭炳聯一於唔講嘢，費事搶主人家風頭，只係專心做開幕禮嘉賓，不過田北辰就忍唔住，爆咗佢同曾國泰原來係中學同學，同喺男拔萃讀書，佢仲爆話曾國泰中學時係運動健將，跑中長途最掂。咁唔知佢睇嘅公司，中長途會唔會都跑出呢？