玩《GT5P》，起初只有350萬Cr，根本買唔起大馬力嘅車，本來無乜好揀，好彩喺Honda度見到由《GT4》已經鍾意嘅IntegraTypeR，三百萬有找，二話不說即時扑槌！揀車時可選配埋心水車身顏色，不過同過往一樣，決定咗就無得改，想儲齊心愛靚色請努力搵錢。
輕輕鬆鬆捧獎盃
先跑同廠Event賽熱身，依原裝設定跑一次，發覺馬力、制動到轉數表現都令我滿意，只係稍嫌FF（頭轆車）先天轉向不足，過急彎一定要守着OutinOut大原則，再睇準時機收油同畀油，到最後勝得有點勉強。遺憾汽車Setting上無乜好調校，又唔換得胎，索性關掉TCS電子輔助系統（透過控制點火、縮油、降波等作用嚟防止汽車打滑），令它在半甩尾狀態下補償轉向不足。再跑一次果然與別不同，未夠一圈已能爬升首位，輕輕鬆鬆捧走獎盃同獎金，登時信心大增，開始正式挑戰C級賽事。
（待續）
記者：徐影龍