身在香港，每天都在忘記，實在因為我們選擇太多，身邊所有事匆匆一過不留痕。所以香港的商舖好多都有主題，為的就是在萬千選擇中留下一點痕迹。《新香蕉俱樂部》的阿Bob（林盛斌）亦然，總要找個主題代表自己讓他人牢記，於是趁放假，來一天「OneThemeDay」，去盡本港主題餐廳、商場、書店，還嚷着必試新落成的香港首個概念影院，望尋找能代表他的人生主題……
記者：馮冠芝
攝影：梁細權
10:30am
愛麗斯夢遊光影 鍾情意料之外
阿Bob來到新開張，以「愛麗斯夢遊仙境」為設計靈感的UA屯門主題戲院。童話？平時阿Bob開咪愛講吓衰嘢，有時又會鬧吓妹妹仔唔用腦諗嘢，童話同呢位「佬」，應該格格不入吧！「最初我以為主題戲院，好似廸士尼咁公仔處處，但估唔到個設計好有CyberFeel！」童話主題CyberFeel，也不知是好是壞！這裏共設4主題影院，就以阿Bob最先置身的那個又黃又藍的影院為例，驟眼真的跟一般影院零分別，卻原來此院主題為「紫醉金迷」，唔止阿Bob，相信真係無咩人估得到！話就話分別以水、森林、地獄等作主題，但最明顯只在戲院凳的顏色，問心，小記有種被搵笨的儍瓜感！始料不及反而令阿Bob更興奮，「我看電影，最愛結局出人意表，一句話扭轉全局，《鬼眼》是我最愛！戲如人生，我亦喜歡我的生活充滿驚喜！」阿BobEQ高，說戲院並非「扑儍瓜」，反正就算愛麗斯跟小兔的主題呼之欲出，睇戲時黑麻麻咪又係等於零！語未畢即選看《蜜蜂電影》，在童話主題戲院看動畫，是估唔到的配搭。
UA屯門市廣場童話主題影院（35168811）
屯門市廣場1期3201舖
街坊唔知有主題
1:00pm
「薯仔」醫肚 憶處男被處「女」欺
看畢電影肚子響，阿Bob找了間以舊式玩意為主題的「薯仔屋」Cafe邊玩邊醫肚。Cafe以老闆Vincent設計的「小薯」為Icon，其洋名SmallPot，講緊的小人物其實是他自己！但方才自覺睇戲是儍瓜的小記，竟又做起「薯仔」？真應景！
Vincent正職是IT工作，老細坐在身後也要用電郵跟他聯絡，受不了這孤獨感，便將玩樂慾望放在小薯及Cafe上，開業3年大受歡迎。阿Bob也喪玩足球機、N年前的世嘉磁碟機，玩玩吓發現——聖鬥士星矢12宮模型：「我細個睇星矢，覺得處女座的守宮好靚女，我好鍾意，點知大個先知，原來佢係男人！」原來阿Bob的戀愛人生，從星矢開始已有許多的「估唔到」！兒時對處女座男人「錯愛」，大個想低調結婚卻被迫在節目公開，「上星期兩家吃餐飯，但不知怎的當時拍的照竟被放上網，我便亁脆公開。」無名指上大剌剌晒幸福戒指。
薯仔屋（分店）（28904884）
銅鑼灣富明街2-6號寶明大廈1字樓L室
2:00pm
兩主題場 極速撇
玩飽食滯，阿Bob便逛個「主題街」消化一下。除主持《新》，阿Bob亦會報道娛樂新聞，所以選以明星開店為主的旺角東京銀座，寓工作於「娛樂」。但上到去零零落落！2:30pm已經行到無晒Mood，轉戰以五行為主題的Elements，同樣冷清！今次罪不在主題，罪在這兒太遠，只賣超高檔貨色。
Elements（27355234）
九龍站上蓋
3:30pm
TeaTime搵Maid服侍 塔羅占工作
阿Bob無心戀戰，寧嘆個Tea，找到以女僕為主題的MaidDateCafe，一入門女僕們主人前主人後，桌上搖鈴作召女僕之用！點了客女僕三文治，阿Bob再次搖鈴！他醉翁之意，在於叫專責幫客人占塔羅的Maid小雲為他占個主題卜，小雲叫他在工作上不要執着，但不執着乜又講到模稜兩可，是她講不清，還是阿Bob的工作本身充斥太多「估唔到」？他最初入新城，當了大半年營業部才轉節目部，但頭3個月亦只負責跟頭跟尾的節目製作，然後有人問：「畀你開咪好唔好？」阿Bob點頭，1個月後立刻上馬，滿嘴懶音神志不清便要背負經典《香蕉俱樂部》個名開咪，「當時壓力很大，只能邊做邊學。」又估唔到，節目由一星期一日至現在一至七，又出碟又出書，雄心壯志要《新香蕉俱樂部》成為10年後的經典，一如軟硬！做唔做到？無人估到。正如今日定晒主題行程，亦有處處估不到……
MaidDate（28080789）
銅鑼灣波斯富街83號波斯富大廈2D
5:00pm
可樂K房隊隊佢
唱K其實好少留意間房有無主題，亦講運氣，今次阿Bob抽到好籤可口可樂K房，勁靚！去主題K房唱主題K，愛聽流行曲的他幾乎唱到唔肯走！
NewayCity（21962196）
旺角豉油街60-104號鴻都大廈地下至2樓
8:00pm
晚餐度屎橋
去以廁所為主題的便所主題餐廳，邊食屎狀雪糕邊度吓「屎橋」，諗吓點先可以再多跨不同媒體吸引聽眾。
便所主題餐廳（23081166）
旺角砵蘭街240-244號旺角文華3樓
