11年前SS夢幻之作！同為SEGA出品、幾可同超音鼠齊名的《NiGHTS》（而且玩法都差唔多！），今次以新世代Wii再續噩夢。新《NiGHTS星降夜之物語》遊戲系統玩法雖如出一轍，但癲玩ProLogicII忽遠忽近、如夢似幻民謠輕音樂，加上WiiRemote指到邊飛去邊，嗰種忽高忽低完全FeelFree操控感，簡直將舊Game經典──夢與飛翔主題實體化！打機本來就唔係主機效能大比拼，「打」係一種感覺！
記者：朱崇德
故事
全世界人人發噩夢
故事一開首，話說生長在兩地互不相識的William及Helen竟發着同樣的噩夢，原因是主宰好夢、以NiGHTS為首的「夢托邦」出了問題，被以Reala為首的噩夢世界，靜靜偷取了大家發好夢的Ideya能量，從而令整個世界只有噩夢。William及Helen在兩個夢境中撞到NiGHTS，並藉由與NiGHTS的精神及能力融合，進而拯救夢之世界。
遊戲一開始就可選擇William或Helen兩個不同夢境，雖然兩邊故事的妖魔鬼怪及夢境內容完全不同，但玩落大家會發現兩人的噩夢有着互相重叠、兼要互相幫助的難關等着玩家，故事性相當強。
玩法
《超音鼠》式追住嚟打
玩法上有一點類似同廠名作《超音鼠》，玩家操控着NiGHTS在夢境穿梭，在版圖中收集Ring的力量後，就可以用加速飛行DrillDash對噩夢怪物作攻擊。基本操控是WiiRemote指向邊就飛向邊，相對SS舊版用Analog手掣玩，自由度大咗。
至於攻略要訣，玩家要注意遊戲是以限時的追逐遊戲進行，所有Boss都係「着草」能手、永遠要你追餐飽；初心者相信會喜歡從後直接作DrillDash攻擊，但玩落你會發現後期如彈珠機貓貓、撞方塊小丑等大佬，需要先從後將它捉着，然後慢慢作迴轉校炮，撞毀場景內一些物件先過關，真係幾有深度。
秘技
ParaLoop轉圈吸魔大法
另一留意操控秘技，是每當NiGHTS空中轉一圈時會產生ParaLoop能力。平時它只是用作收集大範圍Ring的方法，但遊戲中後期你會發現，好多Boss級夢魔在受到攻擊後會化作成群的散珠，玩家要以ParaLoop將佢吸盡先死！齋用DrillDash你就永遠打佢唔死，大大增加遊戲的難玩度。
筆者最後係要一讚遊戲的配樂，打機時大家記得要「炸」住機嚟打！遊戲音樂有點類似民謠及童謠的色彩，再加點點夢幻式的叮叮噹噹聲效作配樂點綴，同ProLogicII作忽遠忽近音效變化，真係令玩家有夢飛翔的完全投入感，配合如夢以幻的遊戲世界絕對夾到絕。
Profile
遊戲：《NiGHTS星降夜之物語》
機種：Wii
類型：動作
生產商：SEGA
價錢：$398
i-Gamer（27253338）
地址：深水埗福華街161-175號福仁商場地下G16及G20號舖