一切應該從幾個月前說起。那時候，大部份香港人還未有機會睇過娛樂版登過劉華先生寫的打氣文章，鼓勵JC跟癌魔抗戰。WingShya一句「係時候要做喇」，萌起幫JC搞相展的念頭。當兩星期前睇到WingShya畀我嘅Facebook留言，那已經是後話。一大班有心人夾手夾腳一齊出力，無非想多點外面的人知道，其實，我們都撐JC。
記者：梁敦濂
攝影：伍慶泉
Profile
JC，原名鄭智聰。
73年生於香港，93年入讀香港理工大學修讀設計文憑課程，99年取得攝影設計系學士學位。翌年成為傳媒集團助理攝影師，兩年後成為集團攝影總監。2003年，JC開設個人影樓，為多位明星擔任攝影工作，如唱片封套等。07年12月舉辦首個個人攝影展及出版首本個人作品相集。曾與周迅、陳奕迅、陳冠希、舒淇及章子怡等藝人合作，其造型照作品更散見於多本本地及海外時裝雜誌。
Photo
Interview
跟JC合作多年的NamKong：
「佢破壞性好強！」
今次相展入面，阿Nam特別喜歡這一張當年搞《士多》雜誌，同JC策劃的一張Styling相，就係琛仔踎喺廁所嗰張。「JC度橋好快，而且一諗到就要去做，仲要即刻做到。好多時候就算影Fashion，個Stylist襯好晒衫、打好晒燈、Set好機，然後埋位開始拍之前，佢會突然間叫個Model除番衫，因為佢淨係想影Closeup！」同樣出名幫藝人做Styling嘅NamKong，其實同JC係理工同學，認為JC嘅風格基本上係唔理別人諗法。「雖然JC嘅破壞性可以好強，但係不得不承認嘅係，佢嘅相每每將被攝者嘅特徵放大，非常有Impact。佢一方面要兼顧客戶需要，不過就唔會過份遷就，所以堅持到自己風格。」
同行兼相展搞手WingShya：
「呢條友夠薑！」
WingShya認識JC，源起《士多》雜誌創刊號封面，並曾以「FiercelyDedicatedtoPhotography」來形容JC對攝影的純愛。「大家都忙，一年見唔到幾次，但係我好佩服JC。無人會無端白事接受你咁主觀的個人風格，要Push嘅。條友夠薑，有火，有自己諗法，所以你會慢慢俾佢Push到。呢行為錢同為知名度而活嘅，大有人在，但佢真係好鍾意影相，睇得出佢係為影相而影相。」阿Wing撐JC，唔多唔少有點識英雄重英雄的意味。「佢嘅黑白系列我好鍾意。手法唔傳統，感覺非常道地，會Last到好耐。基本上，佢影嘅相好有Substance，而且簡單直接兼有國際水準，大頭相更流露出自己嘅內心世界。香港出到個咁嘅攝影師，難得！」
被攝的主角之一黃偉文：
「從皮膚的毛孔中看自己！」
Wyman同JC合作次數其實唔多，數落得兩次，但印象就非常深刻。「其中一次係我被影，一開始，就係不停閃閃閃……淨係見佢不停Press個Shutter，開始懷疑呢個人掂唔掂，哈哈哈！」Wyman認為JC嘅Closeup風格看似隨意，但其實每一刻都在捕捉被拍對象嘅深沉地帶。「Close到個位係你直情見到皮膚嘅毛孔，當你好近距離去睇皮膚嘅時候，就會睇到人所謂岩巉嘅地方，深沉嘅地方，但就會睇到自己。」
Guest
非一般人看非一般事。以下呢幾個人，一係同JC出生入死，一係就一年最多見幾次面，又或者根本唔熟，但卻不約而同地睇得出兼講得到JC的神秘獨步單方。
著名本地藝術家又一山人：
「我RespectJC嘅Passion。佢嘅嘢多Style、感性、Fashionable，有Energy，就算係Commercial嘢，都有一種好Personal嘅敏感。呢個只係一個Journey，希望佢再回歸時，作品會更有Flare，更有深度。我好期待！」
2R：
「我哋同JC係好好嘅朋友，幾乎日日見。佢係一個導演，對影相有種強烈嘅Stubbornness，好有自己一套。」
卓韻芝@903：
「非常欣賞JC，因為一般人都會傾向收埋自己，但係佢就好願意表達自己，話畀人聽自己諗緊乜。另外，我今日可以話係為工作而來，希望聽我嘅人可以買晒佢啲嘢返屋企！JC，神會一直保護你！唉，太驚喇……」
余文樂：
「JC之前一直幫我影好多唱片封套，然後一直都會Keep住上佢StudioHea，食雪茄，講影相，真係好開心。佢作品唔會過份Clean，好有Self，而且特別有Texture。」
阿澤：
「透過認識JC，令我明白到作為攝影師，造型實在係非常緊要。長頭髮兼留鬚嘅JC，喺呢方面可以話做得非常稱職！」
Zing：
「JC嘅作品好Honest，非常TruetoHimself，心入面會Feel到佢嘅Power。佢好夠膽，呢類人真係好難得。JC，你快啲好番。」
JCAwakeningPhotographyExhibition
「Awakening」即喚醒的意思。以此起題，無非呼籲眾人落足眼力，在現場展覽的作品之中，思考其作品暗藏的訊息，找尋合自己脾胃的弦外之音。當然，喜歡的話，你可以帶其作品回家慢慢細味。
AllPrints：$3,000
《JCAwakening》SpecialExhibitionEditionwithSlipcase：$1,000（限量500本）
同場加推三款JCAwakeningTee：各$200
展出日期：即日起至08年1月4日（星期一休息）
時間：早上十一時至晚上八時
地點：中環皇后大道中20號太平行二樓
查詢：21671646