寫完篇《書中自有黃金屋》之後，前日睇《蘋果日報》（十二月十六日）A8版以大篇幅報道一位淺水灣國際學校保安員之子在○五年八月申請到二十萬元獎學金，在國際學校就讀，仲以GPA3.7嘅成績，去咗美國Lewis&ClarkCollege雙主修數學與經濟，副修音樂。「實Q」之子與大富豪呂志和之孫、何東曾孫女一齊畢業，若非有獎學金之助，一定難以做到。但國際學校點解有錢畀獎學金呢？當然係靠啲有錢人不斷捐款啦。
上星期好多報紙報道哈佛大學由明年九月開始，向中產（年薪十二萬至十八萬美元家庭）子弟減收學費，只收每年入息之十分一。本來哈佛大學與耶魯、普林斯頓等名牌大學已實行need-blind政策，清貧子弟只要憑實力入到哈佛，就唔使交學費。富家子弟當然唔志在一年四、五萬美元嘅學雜費啦，但中產家庭就杰咯，年入十八萬美元，交稅之後再為仔女交學雜費四、五萬美元，一家四口都幾難頂。現在哈佛仁心兼大手筆，大幅度減收中產子女學費，難怪全美叫好。
《國際先驅論壇報》話哈佛有三百五十億美元基金（endowmentfund），富甲全球，每年投資收益可觀兼且有大把富豪與校友年年捐款，減收中產學費，完全唔係一個負擔。香港八間由UGC（大學教資會）撥款嘅大學每年得一百○六億港元（上星期立法會財委會數字），伸算係十三點五九億美元，每年每校嘅經費，完全冇法子同哈佛、耶魯、史丹福等相比，你話香港啲大學校長點會唔係使出渾身解數為大學籌款呢？傑出華人徐立之對記者講，如果再來一次，佢都唔會拒絕將港大醫學院改名為「香港大學李嘉誠醫學院」。中大校長劉遵義亦俾某些人批評為掛住籌款，增加資源。此乃歐洲左派教授與左派學生之思想，成日以為可以伸大手板問政府攞錢；法國學生反對成立私立大學，理由係私大會減少窮家子弟求學機會，其實站不住腳。香港嘅大學體制如果向美國學習，就有前途，向歐洲看齊，瓜多過菜，香港不能負擔得起左派思想治校也。