由93年起負責港澳區法拉利Ferrari跑車代理嘅和記行（720），噚日推出全新法拉利430Scuderia，呢部新款跑車每部至少要300萬港紙先有交易，雖然華華覺得好揦脷，但和記行主席李文輝話，出年廿部配額已經賣晒，有錢都未必有得買。你話香港幾多有錢人呢！
咁和記行咪賺唔少，點解中期業績仲要虧損呢？李文輝解畫，話呢檔貴價汽車分銷業務唔算好賺，皆因用嚟請人嘅行政費用，半年就高達6000萬銀，李主席仲話，嚟緊兩年嘅開支都差唔多，可以話未見官先打三十大板。
唔怪得和記行截至今年6月底止中期虧損擴大，由原來蝕1668.5萬增至2056.5萬銀啦，公司話會繼續朝轉型目標進發喎，真係要聽住先。