六福集團（590）靚女非執行董事楊寶玲（Pauline）噚日現身業績記招，冇見好耐嘅Pauline原來去咗美國安胎兼生金豬BB，前排就帶住「發一發（8月18日）」出世嘅寶貝囝囝Nathan飛返香港，開董事會議之餘，順便探吓親戚朋友。
產後嘅Pauline短短4個月已回復苗條身段，全賴親力親為湊BB，收身之道就係要「高蛋白質、低碳水化合物」、「多吃乳酪、只吃全麥」，佢仲提醒生BB之前一個星期要飲椰青，有助排清毒素，BB皮膚自然白白滑滑。
金豬B仔自然萬千寵愛在一身，六福行政總裁黃偉常就送咗一隻金母豬連六隻小金豬畀佢。咁生招牌Pauline會唔會拍住囝囝影番一輯宣傳相呢？Pauline就笑笑口話自己都唔抗拒，不過就要老公批准先得喇。
唔好以為Pauline有子萬事足就唔理六福，佢𠵱家積極喺美國幫六福搵舖，繼續拓展美加業務，仲會設計喺當地出售嘅珠寶首飾，Pauline咁忙，唔知仲有冇時間幫囝囝添個玩伴呢？