上星期一日之內，碰見咗兩位出身背景完全不同嘅人物，令左丁山想到，一個人賺到錢之後，如果想做善事，捐款畀大學做獎學金，可能係最有意義嘅，既可為清貧才子脫貧，亦同時為社會培育下一代精英。
律師E經三十年奮鬥，成為富有一族，家住半山，培養兒子不遺餘力，送佢入淺水灣國際學校，兒子讀書真醒，入到芝加哥大學，啱啱返嚟放聖誕假。律師E急call左丁山去賽馬車會食晏，話兒子有事請教喎。爸爸咁醒，凡事問阿爸就得啦，使乜搵外人呀？不過與律師E咁老友，梗係要去嘅。
見到E公子，眉清目秀，一表人才，說話能力甚強，咦，國際學校畢業生留學美國，講廣東話咁好嘅，問佢識唔識讀寫中文？E公子話：「我讀柏楊版資治通鑑㗎！」不禁令左丁山吃驚，再問佢：「喺芝大係唔係讀經濟？」E公子答：「雙主修歷史與數學，明年畢業。」唉吔，文科理科一齊報讀，歷史與數學好似扯唔上邊，佢竟然一齊主修，以父親之財力，送佢入最top嘅學校讀埋MBA，華爾街投資銀行爭住要啦。但E公子話想返香港做marketing多啲了解中國與亞洲，或者兼讀一個市場學碩士學位，問左丁山有何意見！左丁山大聲叫好，年青才俊肯回港服務，點都要鼓勵吓嘅。
食完飯趕去一間大公司見一位董事總經理。嘩，呢位C董事係劍橋畢業，劍橋博士，畢業工科後就在大投資銀行服務，幾年前轉投上市大公司搞環保投資，傾傾吓，知道佢對中國業務熟悉到不得了，真係專家也，邱局長同佢講環保，講減排，相信似係學生向教授討教多啲，特區政府之內有冇人可以同C董事辯論環保減排呢？真係唔敢講。如此人物，係邊間名校出身呀？去劍橋讀到博士，學費宿費都畀窮啦！C董事好大方咁話佢以前住在沙田沙角邨，全憑獎學金去劍橋完成學業。左丁山為之肅然起敬，亦覺得「書中自有黃金屋」呢句說話未過時，仍然啱用於現代社會。一個有公義嘅社會就係富豪E公子可以少年得志，平步青雲，同時基層出身嘅C董事亦可以得到獎學金而扶搖直上。大家行有餘力，請多捐獎學金。