兩個星期前，學生Ｙ忙於填報大學選科，周圍問父母叔伯兄弟、今年入咗大學嘅中學師兄師姐，最後連左丁山都問埋。左丁山話：「填報大學首選學科，最緊要講個人興趣，你心裏真正最鍾意讀邊一科吖？」學生Ｙ話：「唔係㗎，最緊要係入到中大、港大、科大，填邊科冇緊要。」費事同佢講道理咯，問佢究竟填報咗乜嘢學科。學生Ｙ話：「一共有二十五個志願，我填晒咯。」邊度有人有咁廣泛興趣㗎，究竟搞邊科？學生Ｙ話：「你out咗嘞，個個學生都係咁填㗎喇，由最難至最易我都填咗，但一定冇希望啲醫科、藥劑、計量財務、法律、環球商業等等，我費事填咗而畀人侮辱，一科都冇報。啲會考考到六個Ａ嘅師兄入咗呢啲學系，話讀到隻狗咁都追唔上人哋喎！」佢都好現實，知道自己實力。
講嚟講去，學生Ｙ話佢最後決定以港大經濟與中大經濟為首選，亦填埋港大理學士及其他一啲左丁山冇乜認識嘅課程。讀經濟學合正左丁山合尺，最低限度以後可以借啲書畀佢睇，但何解要填報港大理學士呢？學生Ｙ話：「師兄師姐相信話容易入吖嘛，高考考到DDD，英文E都收㗎嘞，我全班同學都填晒，做後備都好吖。」唔係咁講噃，當所有學生都報讀港大理學士之時，一定有太多學生爭啫，未必入得到。
呢個猜想冇錯，十二月十一日JUPAS宣佈大學聯招最多學生報讀嘅學科，香港大學理學士課程有三千七百一十五人，係全港大學之冠，第二名係城大社會工作，有二千五百五十六人，第三係嶺大工商管理，有二千二百五十七人，第四名係理大護理學，有二千一百五十人。港大理學士課程邊度有咁多學位呀，收人一定好嚴。學生Ｙ知道啲數字後，嘆一句：「想搵一個水泡課程都咁難。」回心一諗，三千七百一十五人報讀港大理學士，係一個浮數，啲考到AABB嘅學生，大概會退出，玩嚫大學啲招生職員。我哋嗰一代要成績最好嘅學生先至入到純理科，讀數理化生嘅同學視工管會計學生在智能上低一級。𠵱家人人視搵工容易為第一要務，追求理論知識係唱高調喎。