有個朋友識咗個有米男友，叫我哋一齊去濠江食白松露，就係賭王何鴻燊以257萬投得重1.5千克世紀白松露菌拍賣嗰一晚；諗住睇吓可唔可以嫁個有錢人，結果，嗰晚主菜係「白松露煮白果」！
好在，嗰晚可優先入住未開嘅新葡京酒店，入到房已經feel到設計與別不同，有唔少暗紅真皮傢俬同巨型座地燈，馬桶、按摩浴缸前各有一部電視，床前嘅40吋電視仲係B&O，咁啱嗰日租咗《DreamGirl》套戲，一放入部DVD機，幾把女聲好似坐喺隔籬唱歌咁！
冲凉時見到個花灑有好多掣，原來可以調校成森林浴、按摩浴，燈光仲忽明忽暗，但最厲害係花灑浴室仲可以變成steamroom，焗吓蒸氣去除疲勞！
新葡京PR話酒店好快開，所有房間都會有上述設施，雪櫃內嘅嘢任飲任食，冲凉用品都係Hermes，最快下年1月會開放嘅係11至28樓，網上優惠訂房由$1,650至$3,050，詳情可以打800-938-688（免費電話）、853-28283838。
逢周一至周四刊出