早前任總話有銀行會見紅嘅言論，搞到大家好似驚弓之鳥，噚日東亞（023）李國寶出席管理專業協會獎學金頒獎禮時，都被問到呢個問題，佢就保持一貫gentleman咁答：「我淨係知自己嗰間，其他嘅你要問番任總。」
寶哥哥唔清楚其他銀行嘅情況唔緊要，清楚東亞嘅情況就得喇，佢話東亞完全冇參與美國次按，即係同大家講東亞好穩健，今日東亞就升咗超過2%。提到次按問題，佢話東南亞同香港嘅影響較細，美國嗰邊嘅情況就嚴重好多喇，佢仲話次按呢個問題唔係一年就搞得掂，起碼要幾年先可以解決。
至於同內地傾緊點樣安排東亞喺上海Ａ股市場掛牌，佢話：「好希望東亞能夠成為首批喺內地Ａ股市場上市嘅外資銀行，傾咗十幾年，到𠵱家都未收到當局答覆，我諗Ａ股應該好快開放畀外資投資機構。」
另外，早前有報道指東亞銀行因為人手問題，停咗收證券新客開戶個幾月，寶哥哥就話，呢個情況只係影響咗一日啫，家陣已經搞掂晒。