大股東趕走董事，華華就見得多，但身為大股東嘅主席職務俾人罷免，華華就真係少聽見。噚日經營可可豆業務嘅環新國際（502）發出通告，公司董事會宣佈，罷免大股東HarmionoJudianto嘅主席同執行董事嘅職務。
通告內容指Judianto由去年開始，已經冇理過公司嘅業務，近排董事會嘗試聯絡Judianto，點知又搵唔到，成個人失蹤失聯絡，結果董事會以四分三票數罷免Judianto，通告噚日正式生效。
環新國際嘅股價自今年4月30號開始停牌，上個禮拜五公司核數師又話唔do，以工作範疇受限制理由宣佈辭任，家陣連大股東HarmionoJudianto又玩失蹤唔見人，講真佢作為環新國際大股東，冇理由就咁人間蒸發㗎嘛。華華真係戥環新嘅小股民閉翳，想走貨又唔得，𠵱家公司又立立亂，投資二、三線股真係要小心為上。