玖龍紙業（2689）董事長張茵可以晉身《福布斯》內地富豪榜榜首，當然唔係泛泛之輩，噚日佢就喺香港上演一幕不懼強勢，爭取到底嘅戲碼畀大家睇，相信呢種性格亦係佢成功因素之一。
話說今年6月人大會議通過咗「勞動合同法」，新嘅勞動法將會喺明年1月1日實施，喺國家大唱社會和諧論調之下，呢條勞動法當然以保障工人利益為大前提，無論長期或臨時工都要簽訂相關合同，明確保障工人權益。商戶嘅勞工成本無疑會加重，不過一向隨機應變靈活嘅商人，自然有對策應付。
張茵嘅玖紙就諗到計，佢哋最近就將旗下東莞廠房一批臨時工外判畀一家公司管理，玖紙再同呢家公司簽約，班工人變成間接為玖紙打工，但玖紙就唔需要為班工人背上合約法律責任，結果引起班工人不滿，引發罷工工潮。
台下連珠發炮遭腰斬
張茵趁噚日國家商務部喺香港舉行一年一度中國投資政策研討會，親自出席向有關官員反映商家嘅難處。佢坐喺觀眾席上，到發問環節即連珠發炮：話中國制訂勞動法，冇錯係可以借鏡歐洲嘅合同法，但中國仍然係發展中國家，低文化嘅大有人在，如果硬性要為臨時工簽訂合同，會令企業用人不靈活，唔能夠輕易解僱人；佢寧願按照生活指數調高工人嘅工資，好過剝削企業請人嘅權力……
講到呢度，主持腰斬佢嘅發言，而負責勞動法嘅代表官員，就冷冷回應一句，話張茵只係企喺商界立場講嘢！激到張茵會後即刻衝上前同嗰位官員交換卡片，話想約對方詳細傾吓，勢要將商界嘅聲音放入官員耳內。張茵咁積極進取嘅態度，商界組織可以考慮搵佢做代言人，為商界爭取權益。
大家姐性格剛強
中國第一個女首富嘅張茵，堅毅剛強嘅個性，同佢嘅成長背景不無關係，佢父母係南下嘅軍隊幹部，喺文化大革命期間，父親受迫害入獄。張茵係8兄弟姊妹中嘅老大，自然要幫阿媽擔起頭家，照顧弟妹啦，不過佢都冇放棄學業，中學時日日走十幾里山路返學，成績依然名列前茅，若然少啲毅力，一早就放棄學業啦。
喺80年代，張茵帶住3萬蚊人仔嚟香港闖蕩已經唔容易，風險更加經歷唔少。話說佢造紙堅持品質第一，所以唔跟行家喺紙漿裏面摻水嘅做法，但就俾同行話佢違反行規，據講仲接過黑社會嘅恐嚇電話，搞到合夥人都怕怕，偷偷喺啲紙裏面摻番水，不過，張茵就一啲都冇退縮，堅持自己嘅做法，最後因為佢夠公道，收廢紙嘅公司都肯同佢做生意。可以話，只要認為自己係啱嘅，佢一定會堅持到底，黑社會都唔怕，內地官員都冇有怕。
廠房工潮 警方戒備
張茵之所以咁勞氣，其實因為佢剛啱先擺平咗單工潮。玖紙喺東莞嘅廠房有千幾名員工上個禮拜四罷工示威，抗議玖紙喺新勞動法推出前，單方面更改僱員合約，將工人合約外判畀另一家服務管理公司，班工人以為被炒，咪搞罷工囉，仲勞動東莞當局出動100名防暴警察到場戒備，張茵嗱嗱臨趕返工廠，親自同員工談判，先至平息事件。
新勞動法係啲乜？當然係對打工仔有so，對老闆冇着數嘅嘢啦！唔係啲工人點會咁激搞罷工，仲爭啲爆發大規模衝突呢。按照新法例，工人做滿一年，如果被炒，可獲得1個月嘅補償金，而做夠10年嘅員工，更有權成為公司永久員工。今次玖紙罷工，就係啲工人擔心被外判變相取消過去年資，要重新計算，冇晒長期保障兼被扣減福利。
打工仔咁辛苦工作，如果到頭來原有嘅福利同保障，有可能化為烏有，梗係擔心同㷫啦！事後張茵出嚟解釋，話班員工受人誤導，公司冇剋扣福利或者變相減薪，會嚴格遵守新勞動法。
電郵：mailto:[email protected]