係呀，棍波好玩呀呵？上斜塞車塞你半粒鐘，保證吊極力子吊到腳震；係呀，四驅爬山正呀呵？你一個星期有幾多日假？咁好雅興去遊山玩水？仲有，個加減波你有幾可開嚟玩？買車頭兩個月囉，之後咪多隻香爐多隻鬼。
唔想咁多鬼，都係簡單舒服最好，呢架CR-V係前驅版，夠晒實際又慳油，5前速自動波唔會搞事，總之畀油就去舒服夠力。嫌普通？咁你就錯喇！新款包圍配電鍍20吋軨，閃到好似去咗哈林區咁Yo，內櫳Seat位又包晒格仔麖皮，年輕人，都係Buy造型多啲。
文：嘴嚼爺
攝影：楊錦文
Model：Coie
電鍍包圍
套新包圍最正係個車頭，因為用橫間電鍍銀邊取代大大個「H」字，貴格好多。另外全車窗框邊亦加上電鍍飾邊，呢個設計我最記得賣成球嘢嘅Q7都有，不過呢款CR-V嘅車價只係30萬多啲。講到最搶眼，都係四輪20吋胎軨，閃到Model見到都忍唔住大讚夠BlingBling，襯埋全黑車身，有啲HipHopFeel喎。
老實講，喺街見唔少咁嘅配襯格局，不過多出現喺bB身上，今次CR-V着上身，感覺冇咁俗套之餘，亦令這車予人煥然一新感覺。
一味實用
無古靈精怪花巧新科技，這部CR-V有嘅設備，全部都係為照顧用家需要。一坐上車，無話二十幾個掣等你Set，插匙一撻就開車，波棍位設於中控台位置，加上腳踏式泊車掣，就手就腳。
香港無熱帶雨林，前輪驅動版本已經夠玩，而且耗油量只係12.2km/L，牛龜咁大架車嚟講算係咁喇。
開車往拍照地點時，眼見面前一副大面板音響，可惜無CD喺手，以為無用武之地就入後波倒車泊靚位影靚相，咦？原來有後波鏡頭喎。雖然家陣好多汽車都有倒車鏡頭，唔算好威，但有得用嘅時候你就知幾方便，加上特大側鏡，就算泊超窄車位都有把握好多，尤其呢架車Size唔算細，無呢啲設備你都幾頭痕。
其實仲有一個實用重點，不過日光日白試唔到，就係頭燈會跟隨軚盤而微微轉向，夜晚上飛鵝山天文台之巔咪有用囉。
舒適百搭
其實我想講，我最鍾意佢個內櫳，5座位全部包上黑皮，中間部份更用上紅線格仔麖皮，低調中滲潮味。而且有天窗空間又夠大，後座坐3個人都唔太迫，而且前座座椅都有手枕，揸嗰個或者坐嗰個都好鬼大爺。而且身為SUV，後座座椅都可以放平屈埋增加載物量。
功能靈活，加上百搭外形，做腳車勝任有餘，耐不耐獻殷勤幫人搬吓嘢又得，揸出去接女仔，着西裝去酒店食飯都無失禮，咁，咁百變實用仲想點？
HondaCR-V規格
引擎：2,400c.c.DOHCi-VTEC
馬力：170ps/5,800rpm
扭力：22.4kgm/4,200rpm
傳動：5前速自動波，前輪驅動
尺碼：4,520×1,820×1,690mm
車輛提供：富利堡（28776700）
供款幫你計：
首期：$32,900
年期：48個月
利率：6%
月供：約$7,650