華華去做訪問，都見唔少行政總裁（CEO），最深印象嘅，當然亦係對香港人嚟講影響最大嗰一班大孖沙，好似李超人、香港股神李四叔，同埋新地（016）郭氏三兄弟等。不過，除咗香港「出品」嘅CEO，全球嚟計，最受歡迎、最令人敬佩嘅又係邊個呢？唔係股神畢菲特，而係IT界嘅精神領袖喬布斯。
喬布斯嘅影響力有幾大，唔使華華多講，睇佢重返蘋果電腦後，推出嘅iMac幾受歡迎就知，佢今個月初先至俾《財富》雜誌評選為「全球25位最具影響力商界領袖」嘅榜首人物，噚日環球公關公司凱旋發報咗個調查，發現嚟自全球11個國家，受訪嘅2750個具影響力嘅人士當中，有6個國家都揀喬布斯為最敬佩嘅CEO，多過維珍航空嘅布蘭信。
雖然，喬布斯喺老家美國唔夠股神畢菲特攞到17%票數咁勁，只係做阿二，但加拿大、德國、法國同巴西等國家嘅受訪者，都覺得佢最掂。無他嘅，自從佢97年9月重返蘋果電腦，蘋果嘅股價就不斷創新高，至今升咗33倍。
有責任預防暖化
講番個調查報告，其實主要想睇吓企業同行政總裁嘅角色同責任，發現今時今日嘅CEO，唔係話幫公司搵到錢就得，一個令人敬佩嘅CEO，更重要有慈善精神、進取心同埋道德操守，歐美國家甚至認為大企業嘅CEO，同政府一樣有責任預防全球暖化；而美國人就覺得，CEO主要責任之一係提供足夠嘅醫療保障畀員工。
比較有趣嘅係，已發展國家如中國、巴西同印度等，對大型企業同佢哋嘅CEO比較信任，好似中國咁，受訪者對CEO嘅信任超過三成，比民選官員、非政府組織嘅幹事及新聞工作者都高，但喺英、美及德國等地，CEO嘅可信程度都不足一成。
全球最令人敬佩CEO調查
國家：美國
CEO（得票率）：畢菲特（17%）、喬布斯（14%）
國家：加拿大
CEO（得票率）：喬布斯（13%）、布蘭信（12%）、畢菲特（11%）
國家：英國 CEO（得票率）：布蘭信（40%）
國家：德國 CEO（得票率）：喬布斯（19%）
國家：法國
CEO（得票率）：喬布斯（12%）、布蘭信（11%）
國家：意大利 CEO（得票率）：阿曼尼（24%）
國家：西班牙 CEO（得票率）：喬布斯（14%）
國家：印度 CEO（得票率）：米塔爾（45%）
國家：中國 CEO（得票率）：李嘉誠（29%）
國家：巴西 CEO（得票率）：喬布斯（29%）
國家：阿根廷 CEO（得票率）：喬布斯（26%）
企業道德未達標
CEO不易為，因為大家嘅要求越嚟越高，凱旋環球企業個調查亦都睇吓大家對一間大企業嘅要求去到邊，而呢啲大企業又達唔達到大家嘅要求，結果係──差強人意。
喺中國及已發展國家嘅人，都覺得一間大企業為環境帶來貢獻、決定合乎道德標準、對員工提供公平報酬及誠懇溝通，都比賺錢更重要，不過，啲企業都未能符合佢哋呢啲期望，相差最多嘅就係「依從道德標準」呢一欄，差距43%，呢樣嘢，令華華諗起百佳油魚，可以話係一個典型例子。
企業不符期望嘅地方
依從道德標準
重要程度：86% 表現：43% 差距：-43%
誠懇溝通
重要程度：83% 表現：41% 差距：-42%
為員工提供公平報酬
重要程度：85% 表現：43% 差距：-42%
為環境帶來貢獻
重要程度：79% 表現：34% 差距：-41%
經企業公益活動回饋社會
重要程度：3% 表現：34% 差距：-29%
李嘉誠拋離畢菲特
前日港台徇眾要求重播《傑出華人系列──李嘉誠》訪問，噚日又有個調查報告發表，李嘉誠成為中國人心目中最敬佩嘅CEO，你話李超人幾咁受人歡迎。根據調查，李超人獲接近三成嘅中國受訪者支持，得票率遠遠拋離第二位嘅股神畢菲特，股神只獲得9%支持。受訪者讚李超人「能以無比嘅魄力與決心，將遠見實踐並締造業務佳績。」
喺最敬佩嘅中國企業CEO嘅調查中，李超人同樣亦以29%高票當選，排名第一，其次，就係早幾個月喺香港掛牌上市，阿里巴巴（1688）主席馬雲，得票率8%，第三及第四位，就分別係中移動（941）嘅王建宙同聯想（992）嘅楊元慶，獲得6%支持，第五位就係招商銀行（3968）嘅馬蔚華，有5%得票率。
電郵：mailto:[email protected]