【本報訊】肆虐港島區虐殺30隻流浪貓的「貓殺手」仍逍遙法外，旺角又出現另一名貓殺手，個多月來已有兩隻小貓慘遭虐殺，昨晨貓殺手再次出動，一隻黃色帶虎紋的小貓頸部被勒、右後腿遭人扭斷陳屍同一條後巷。警方到場調查並承諾加強巡邏，由食環署人員清理貓屍。愛貓組織期望警民合作揪出變態貓殺手，明日將與立法會議員商討喚起各部門關注虐畜問題的方法。 記者：梁澤岡
現場為新填地街566號一間建材公司的後巷。據該公司負責人何女士表示，她在年多前開始在後巷擺放食物及食水飼餵三隻流浪貓，個多月前一隻叫「二妹」的貓女首先遇害。「我見到佢（貓）死咗喺後巷，冇為意，以為佢跌死。」何將二妹拿到動物善終服務機構火化。豈料半個月前，何又在後巷發現另一隻叫「側側地」的貓女陳屍：「佢死狀好恐怖，好似俾人吊頸行刑咁，死到凸眼凸脷，個肚仲俾人踩扁晒！」她懷疑側側地被冷血兇徒勒斃。
貼通告咒罵虐殺者
何女士為警告變態殺手，在後巷貼出通告咒罵虐殺者「虐殺貓者死無全屍……食嘢鯁死，行街跣死，賭錢輸死，有病慢慢折磨等死，出街俾車撞死！」其間部份通告被人撕去，何又再張貼還以顏色。
但詛咒並無窒礙變態殺手的冷血行徑，還變本加厲：「今早執紙皮嘅阿姐話我聽，又見到一條貓屍，我個心真係沉咗落去，出去睇吓，見到一歲大黃色有虎紋嘅『黃仔』伏屍後巷，條頸被勒有血迹，右後腿被扭斷，我即刻話畀朋友知，佢話咁樣落去好大問題，叫我報警。」
警員到場了解事件後通知食環署撿走貓屍，又通報上峯，承諾會加強巡邏後巷。何女士指鄰舖是一間裝飾公司，凌晨4時還有職員留守，她估計貓殺手是在凌晨4時至清晨7時出動犯案，她與鄰舖商討後決定在後巷加裝閉路電視，期望攝得兇徒樣貌及逞兇過程，交予警方調查。
特稿：團體盼警民合作緝兇
愛貓組織分析有關旺角貓殺手的行兇手法，認為與肆虐港島區的貓殺手不同：「港島區嗰邊鍾意用有毒藥的貓糧放在後巷牆角，等貓中毒後暈陀陀，再用磚頭等硬物猛砸貓頭，旺角呢個似05年曾出沒的貓殺手，專扭斷貓仔嘅四肢！」她希望警方可加強巡邏後巷等陰暗位置：「我哋唔係想搞大件事，只係想與警方合作揪出兇徒！」
口頭稱加強巡邏
香港群貓會幹事Elaine表示，該會曾向警方反映虐殺動物的問題：「佢哋雖然口頭話會加強巡邏，但佢哋態度好有保留，曾經有差人講過呢啲係無頭寃案，冇疑兇，冇被告，唔會接受我哋係原告。」
Elaine說港九、新界均出現貓殺手，除銅鑼灣、香港仔外，新界如屯門、粉嶺、上水、大埔等動物被虐殺情況「好誇張」，多數在後巷下毒手，部份更入侵屋邨。
Elaine說警方曾表示她們最好能提供證據，如拍攝行兇者施虐時的短片作為證據，她無奈說：「唔通睇住個兇徒殺緊隻貓，仲喺度慢慢影住佢咩？係都即刻阻止佢啦！」
本報記者
