得罪講句，國奧隊真係好惡！唔係我求大俠有偏見，而係國奧隊「往績」真麻麻，所指嘅「往績」係紀律問題，好似前日同美國奧運隊拍跳，又同對方球員發生衝突，點算好？另外，當日場波中國喺完場前得到一個問題12碼而追和3:3，連美國隊教練賽後承認怕怕：「唔想再對中國隊咯。」
今年2月，國奧隊遠赴歐洲集訓唔夠兩個禮拜，就先後同多支球隊「埋牙」，最激一次係喺倫敦同昆士柏流浪預備組球員爆發「混戰」，拳來腳往，嗰次「全武行」令國奧隊「一戰成名」，應該冇咩球迷忘記。
互有推撞兩人被逐
前日喺廣州對美國奧運隊，話說王曉龍補時同美國隊球員克斯坦互有推撞，雙方球員開始圍埋一齊糾纏，眼見「開片」在即，好在班教練團及時阻止，先至無打大交。少不免，兩個動粗球員都被逐離場啦。
另一個問題，係國內外傳媒都覺得國奧隊入3:3嗰球12碼係博番嚟，即係插水，連國內傳媒都咁評論，球波應該真係有問題。美國奧運隊教練路華克就先兜咗個圈寸國奧隊：「喺中國，我哋無論係接待、住宿反方面都得到禮待，但喺球場上完全係另一回事。中國隊表現好好，佢哋喺各種幫忙下最終扳平。」
美教頭：怕咗你
好明顯，路華克好唔滿意個12碼判決，覺得國奧隊獲球證偏幫。講講吓，佢先至單刀直接講感受：「一句講晒，我祝中國隊喺明年奧運比賽好運，但假如我哋晉級嘅話，希望唔使再同呢隊東道主交手咯，──佢哋肯定得到很多幫忙。」唉，今次大交打唔成，但人家針對偏幫呢樣嘢，講到出口就認真唔畀面，希望今次事件，唔會影響北京奧運嘅形象啦。
