《GT5Prologue》終於推出，雖然中文版延期至一月，不過對機迷+車迷嘅我嚟講，好難忍得手，思前想後死死哋氣買隻日版嚟煲。喺灣仔東方188以$290入貨，好多人嫌貴、嫌內容少，但我可以話畀你聽，從放入BD落PS3、Opening、主介面到車種Demo，未玩已充份感受到製作者嘅誠意同心機，那種高級的華麗感，給我極大視覺享受，最正係不斷轉換靚景嘅主介面，看着心愛靚車輕躺喺法國小鎮，呢三條紅衫魚，我覺得抵畀。
初段選擇不多
未正式買車鍊車，先到「GT．TV」下載最新一段高清影片，睇吓GT之父山內一典同開發部鈴木先生點樣踩盡架GT-R，示範跑高難度山路紐堡林。欣賞過後就飛快Click入Dealer度買車，22間廠合共37款車，平均每間車廠提供1-2架，唯獨日產有成7款咁多，可見SCE跟NISSAN有幾Friend了。有趣的是，大部份日系車廠都有現身，偏偏獨欠龍頭大哥Toyota，取而代之是Lexus，想揸AE86、Supra可能要等08年尾《GT5》正章推出了。
一開波荷包只有350萬，好多車都買唔到（法拉利599要三千幾萬），明知開頭要衝冠軍攞獎金，當然唔會貪平揀架Cappuccino嚟Hea，可惜37架車入面有1/3太貴或禁售，有1/3馬力太弱，剩低有乜揀？我就鍾情其中一架平平哋嘅頭轆車，除專屬賽事，佢即晚就幫我輕鬆贏晒C、B級金牌返嚟，兼且毋須高超技術同記位，儲錢買AudiR8一流。到底係邊架？聽日話你知。
記者：徐影龍