將軍澳網友陳小姐分享隻「坐艇」股中國林大（910），佢喺兩個多月前用2.8蚊買入，揸咗3個月，目標價最初定咗5蚊，睇升近八成，冇定止蝕價。點知後來越跌越多，噚日林大仲最多急挫22%，收報1.22蚊，下跌15%，同7月尾嘅即市高位3.2蚊比較，累積跌幅達62%。
當初點解睇好林大，陳小姐話：「睇報紙話林大會變身，收購生物能源業務，加上本身經營嘅林業前景，應該亦唔會太差，市盈率又唔係好高，咪入貨囉，點諗到家吓跌咁多！」
大市急挫技術性沽盤現
荷蘭銀行私人投資產品部董事何啓聰表示：「之前市場好多人炒作林大，唔少投資者喺高位入貨，𠵱家大市急挫，出現技術性沽盤，令林大跌得好急。」他認為：「嚟緊要睇實林大嘅業績，盤數靚唔靚，國家環保政策有冇影響到公司業務，當然派唔派到息亦係好重要嘅考慮因素。」
孫柏文就話：「𠵱家林大嘅市盈率跌到只有4倍，如果林大今年嘅業績交到貨，甚至有增長，唔排除股價可以反彈好快。」何啓聰補充：「如果最新公佈嘅業績係蝕錢，就要快手忍痛止蝕。」
炒二三線股最緊要止蝕
陳小姐滿腦疑問，「林大嘅舊年業績又唔係唔好，有錢賺，加上仲話有收購，應該係好事嚟㗎嘛！咪冇定止蝕價，但家陣股價跌咁多，咁化學，真係唔知點算？」
何啓聰就話：「投資二、三線股最緊要定止蝕，2.8蚊買入，就應該喺2.5蚊定止蝕，家陣林大跌咗咁多，坦白講，以現時股價反彈兩三成，一啲都唔出奇，但即使係咁，亦返唔到陳小姐嘅買入價。」佢再補充：「喺好市時，公司有收購係好事，但當市況逆轉，就變成壞事，因為咁會增加公司負債。」
天津天聯（8290）
市況差 小心8字頭
九龍灣網友梁太推介天津天聯公用（8290），建議2蚊入貨，目標2.5蚊，揸半年，睇升兩成半，1.8蚊可止蝕。天津天聯噚日股價逆市升2.4%，收報2.1蚊。梁太推介，「配合中央政策，經營環保嘅天然氣，兼且又話母公司天津燃氣集團未來兩、三年會注資。」
何啓聰表示：「市況氣氛唔好，𠵱家炒8字頭股（創業板股）未必咁適合喎，只有市旺先至多人會留意，除非業務有突破或者新消息公佈，佢今日嘅成交額只得100萬，成交疏落，買咗可能隨時走唔到貨。」
梁太問：「咁市況唔好，係咪要調低買入價呀？」孫柏文就話：「睇圖嚟講，建議入市價合理，但家陣公司市盈率成70幾倍，就算股價跌一半，都有成廿幾三十倍，對公用股嚟講係好貴，冇乜防守性。」何啓聰再補充：「炒重組概念，最緊要睇幾時會進行，過去歷史數據未必有幫助，現時市況氣氛唔好，投資8字頭股都係要小心。」
梁太建議
買入價：$2
目標價：$2.5
止蝕價：$1.8
時間：半年
沽期指 等穿二萬五
將軍澳Michael認為，𠵱家完全冇好消息支持，加上美市淡靜，故看淡大市，不過就唔知用邊種對冲工具，Michael話：「𠵱家究竟沽期指好，定買恒指Put輪好？」
何啓聰話：「我覺得沽期指會着數少少，因為臨近假期，恒指未必會落，引伸波幅會落，加上有時間值損耗，直接走去沽期指係一個好策略。」不過，孫柏文覺得目標二萬五千點唔係一個合理嘅支持點，Michael解釋自己唔想追得太遠，所以建議二萬五套利。
何啓聰覺得，股市「有少少頭肩頂嘅味道」，佢話：「如果質穿咗兩萬六，要去到兩萬三先有支持。我覺得應該set番個止賺位，如果去唔到兩萬五，兩萬五千五有反彈，咪食咗糊先。」Michael進一步建議：「因為二萬五喺九月時有個裂口，陸東睇二萬三，如果穿到兩萬五，大家咪睇二萬三囉。」
Michael建議
建議買入價：即買
目標價：恒指25000點
止蝕價：—
時間：1星期
今日嘉賓：亨達集團研究部董事黃敏碩
每日收市後4:30pm
歡迎Phonein28698262
http://appleactionews.com/features/finance/
想搵名家教路，請登入以下網址
http://appledaily.atnext.com/jp/finance登記
成功參與節目者，有機會獲贈禮品
＊以webcam參與節目者，可額外獲贈KFC$200現金券
