大市波動，銅鑼灣網友李小姐推介中電控股（002），建議52蚊入貨，長揸1年，目標價56蚊，睇升7.7%，止蝕位50蚊。中電噚日股價穩升，收報53.9蚊，升2.1%。
李小姐對中電充滿信心，「估計明年大市嘅升幅唔會好大，甚至乎有機會短暫下調，相信將資金買公用股中電會安全啲。」
息率4.55厘 穩陣過滙豐
孫柏文好奇問：「如果講穩陣，咁點解唔揸現金？」
李小姐即刻話：「中電派息唔錯嘛，𠵱家嘅息率都有4.55厘，我覺得佢仲穩陣過滙豐（005）㖭！」
亨達集團研究部董事黃敏碩表示：「買中電前，投資者先要搞清楚，中電係一隻防守性強嘅股票，跌市時，股價唔容易跌，抗跌力強，但當升市時，股價未必會郁，投資者到時唔好怨人又閉翳。」
佢認為：「揀中電都啱嘅，股價穩定，又有息派，加上市場預期嚟緊嘅利潤管制，亦唔會太影響未來盈利，不過論業務前景，則較睇好另一隻公用股煤氣（003）。」
可以加電費 勝內地電股
李小姐亦認同：「係囉！中電又可以加電費，好過唔少大陸電力股，佢哋想加價都唔係咁易。」
黃敏碩補充：「內地電力股受制於價格機制，唔可以隨便加價，好似今日內地煤價合約加價一成，但大陸為控制通脹，相信內地電費未必會加價，無可避免會影響內地電力股嘅邊際利潤，令股價受壓。」
孫柏文補充：「嚟緊中電會興建LNG站，如果計劃落實，中電資產將會大幅增加，就算有利潤管制影響，未來盈利亦相當可觀。」
黃敏碩亦好同意：「相信中電嘅前景會比港燈（006）更加吸引。」
恒生銀行（011）
追買立即中伏
沙田余先生喺138蚊入咗恒生銀行（011），見佢喺高位170蚊跌番落160蚊仲追買，點知就咁中伏。黃敏碩解釋，「恒生近期跟大市跌，除咗減息因素已消化咗，次按衝擊仲未消除，上周任總（金管局總裁任志剛）嘅言論，話本地有銀行虧損，亦拖累銀行股回軟；不過，相比起啲中小型銀行股，恒生跌幅算少，有一定防守性。」黃敏碩又指，「恒生管理層處事一向審慎，擁有嘅分行網絡同埋存戶較多，發展財富管理亦幾好；如果明年樓市造好，仲有利公司嘅按揭業務發展，屬防守性高嘅本地銀行股。」佢認為余先生可繼續持有，唔使急於止蝕；若擔心調整未完，則可以喺143蚊先行止蝕。
中油香港（135）
最能反映油價
銅鑼灣網友Frederick推介中油香港（135），想博短炒反彈，入市價4.5蚊，目標價5.5蚊，4蚊止蝕。噚日中油最多跌成5.5%，收報4.89蚊，跌3.2%。佢話：「自己有個信念，石油無可取代，將來油價只會繼續高企，其次，中油香港係咁多隻油股中，盈利最能反映國際油價，高油價，高盈利。」所以Frederick喺今年4月已經沽咗中石油（857），換馬到中油。
黃敏碩表示：「𠵱家股市易跌難升，從短期走勢嚟睇，中油香港未必有力彈番上5.5蚊，如果股價由4.5蚊位，升到5蚊左右，可以先行走貨，而止蝕價定喺200天平均線嘅4.3蚊位，會較穩陣。家陣市況氣氛較淡，揸大隻股較適合。」
中國財險（2328）
上落快 溝貨博後抽
大埔關公想問中國財險（2328），自己6個幾已經有貨，上星期又入咗啲，諗住跌得差唔多，點知星期一又跌，想搵人教吓路。財險噚日最低見過9.79蚊，最後收10.38元，跌0.8%。
黃敏碩話：「近期財險都係一浪低於一浪，佢嘅100天線喺12.4蚊，𠵱家穿埋11蚊，技術走勢真係轉弱咗。」關公話唔驚，「多數人都16蚊入，我𠵱家拉勻都有錢賺，同埋佢上落快囉。」黃敏碩都有啲認同，認為博後抽嘅話，應該有機會，但補充：「𠵱家佢開緊聽證會，保費率可能會下調，我個人覺得，佢做強交險profitmargin低，論基本因素，喺三隻保險股中相對排得後啲。就算博後抽，都唔好預咁多水位。」
-關公個案-
買入價：$11
目標價：$15
止蝕價：$8
時間：半年
專家回應：技術走勢轉弱，宜調低獲利目標價
中石油（857）
想再入 宜分注吸納
讀者何文田David唔肯定好唔好現價吸中石油（857），黃敏碩話：「中石油最近有好多政策因素，包括暴利稅，𠵱家又要徵收特別稅項，所以盈利方面一拉高去某個百分比，佢都要進貢。」黃敏碩指，𠵱家市況動力不足，搞到中石油走勢較弱。
事實上，David曾經喺9.85同13.9蚊買過呢隻股，並分別喺14.5及15.4蚊放咗，𠵱家又想再入市，佢相信話：「石油始終都係必需品。」黃敏碩就認為，現時中石油走勢較弱，建議David如有信心，可分注吸納。
另外，佢哋講開油股，又提埋另一油股中石化（386），黃敏碩話：「講起中石化，我覺得佢比較強。」佢提到中石化嘅業務較為分散，噚日開放嘅進口稅補貼，加上零售市場對中石化成品油需求大，可能出年國家會改善成品油價格機制，故此短期相對睇好中石化。
-David建議-
買入價：現價
目標價：—
止蝕價：$10
時間：—
專家回應：宜分注吸納，嚴守止蝕，短線可吼埋中石化（386）
今日嘉賓：亨達集團研究部董事黃敏碩
每日4:30pm
歡迎Phonein28698262
http://appleactionews.com/features/finance/
請登入網址
http://appledaily.atnext.com/jp/finance登記
成功參與節目者，有機會獲贈禮品
