香港人除了捨得花錢食好嘢，也捨得花錢買笑，辛苦搵嚟自在食，也自在笑，若然花個三幾百元可以買來一頓笑的話，打工仔們願意掏腰包數鈔票騰出時間付出信任，但須擔保買到兩啖笑，如果最後發現唔好笑或笑唔出，打工仔們會憎你一世，因為除了蝕了金錢時間信任，還會遭同事朋友笑係蠢仔sucker，又要付出又反而俾人笑，慘過十二章包人自摸。
誰有金漆招牌擔保有幾啖笑，笑之餘又言之有物，令身邊同儕覺得你幫襯佢確實又有taste又有型有款又剩，呢個佢就係黃子華。子華堪稱香港棟篤界之父，前當然有古人做過，但做得唔夠子華大聲、普及，學無前後，大聲為先，誰是真正第一個，只有歷史學家感興趣，對升斗市民來說，誰發出最大聲音讓人注意到，誰便算是第一人。
「黃子華喺大學讀哲學㗎，佢講嘅嘢真係……好……好咩㗎」，「咪係，又攪笑又有內涵又靚仔，真係偶像呀！」年青不貌美的小妮子跟滿面青春痘的小伙子入場看子華時高聲談論。
子華除了喜歡演戲、棟篤，也喜歡唱歌，這次的演出中，加入了較以往多的歌唱部份，一雞兩味，子華的歌迷們雙料娛樂。棟篤笑的內容中有一part講每個人心中都有一個二五仔，二五仔的存在是為了「跣」自己，令自己在不明所以的情形下做錯事，好笑之餘有深意，有趣的是不約而同跟杜琪峯＋韋家輝的近作《神探》題材不謀而合，看過電影版，再看棟篤版，不同作者在人生中相若時間對同一課題有不同見解作出不同詮釋，各師各法，殊途同歸，有趣。