一班立法會波牛單仲偕、陳智思同長毛等，噚日喺小西灣運動場同醫學會舉行友誼賽。話就話係波牛，其實都係停留喺睇同講嘅階段，事關佢哋落到場表現唔算特別出色，醫學會喺開場唔夠10分鐘已經入咗一粒，搞到成班議員騰晒雞。好彩陳智思請嚟嘅「外援」喺完場前5分鐘射入對方嘅空門，符碌地幫議員隊扳成1比1，咁至令議員隊幸保不失。
劉秀成一向被人笑佢守龍門等於人哋有空門，點知佢噚日表現都算出色，救咗至少一球波咁多，有口痕友忍唔住大笑「第一次見佢救波。」單仲偕最有準備，知道自己跑唔足成場，帶埋細仔子灝做自己後備，半場後就同老婆喺場邊睇細仔踢波，好鬼溫馨。