每年未到聖誕我就開始發噩夢，夢中我被菠蘿腸仔綁住，望住成千上萬士多啤梨芒果坐喺廳睇電視，紅酒啤酒浸滿了我個浴缸，仲有……我發誓以後唔會一個人預備十幾位豬朋狗友狂飲狂食狂歡一晚的大食會！今年聖誕，一於訂到會，中西意法美各國特色美食樣樣齊，仲有小丑送上門助興，今次仲唔甩難？
文：肥田
攝影：陳陶鈞
Model：Hidi、Sandrigo、Cherry、Catheine&Issac
懶人最啱 有嘢食有得玩
我終於解脫了！到會，對於我這種唔想煩唔想諗唔想煮的超級懶人嚟講，實在是最偉大的服務！最重要是可以帶埋一位逗得一家大細都開心的小丑返屋企，都咪話唔正！傳統美國聖誕大火雞、迷你漢堡熱狗、木頭蛋糕、鮮果撻統統都是配菜，有得玩、有表演睇先係MainCourse。多得小丑Bobo不但帶來佢嘅拿手好戲扭波波，佢仲係一個專業侍應，山長水遠推部爆穀機嚟，炮製很多甜蜜的爆穀，的確令我輕鬆好多！
迷你熱狗（前）、迷你漢堡（後）
漢堡以加拿大西冷扒加入洋葱、甜椒等攪成，肉汁豐富，牛味十足。迷你熱狗則內有亁坤，自製麵包鬆軟無比，配皮脆多汁的熱狗腸、爽口生菜和新鮮番茄，醬汁？不用了﹗
聖誕朱古力木頭蛋糕
傳統木頭蛋糕，其實是朱古力海綿蛋糕外均勻地鋪滿軟滑朱古力漿，再於蛋糕面層畫上木紋，像真度極高！
傳統聖誕燒火雞配釀餡
要將火雞焗得金黃均勻，肉汁足夠又嫩滑絕非易事。大廚話秘訣在於將火雞的肉汁灑回火雞上，短短個多小時便要灑四至五次，雞皮吸收肉汁的精華後，才不會亁爭爭。
Madison（25234772）
地址：中環夏愨道10號和記大廈地舖
聖誕派對到會餐單（10人份量）
迷你漢堡、菠蘿火腿沙律、粟米蝦沙律、脆炸雞翼、迷你熱狗、火雞肉番茄手指三文治、肉醬意大利粉、聖誕朱古力木頭蛋糕、聖誕曲奇餅、鮮果迷你撻、鮮果沙律、傳統聖誕燒火雞配釀餡（14磅）及蜜糖火腿（4磅）
收費：$2,200，另加$300運輸費（須於三天前預訂）
備註：小丑及爆穀機到會另加$2,000（兩小時）
有機美食好睇又健康
到會一般以煎炸食物為主，雖然好味，但形象不太健康，想健康，可以試試有機小食！Munch老闆Kent及總廚阿傑花盡心機將有機食物變靚啲：「我們主力用有機醬汁配其他食材，好似有機蜜糖、小米來做甜點餅底或班戟，味道一樣咁好，而且有機蜜糖更易被人體吸收，加埋應節裝扮，好睇好食又健康。」另外，Munch不少小食都是即場炮製：「我們堅持將食物最靚的一面放在人客面前，如煙三文魚班戟，一定要到場後才逐一整好。不然途中出了甚麼意外就無得救！」阿傑仲話服務員全都經過大廚的檢閱，每位都是非一般的外賣員！
迷你紐約芝士餅
大廚推介，芝士味濃而不膩，蛋糕面還綴以糖製成的硬身聖誕老人，而且細細件，一啖一件，一軟一硬好合拍。
迷你香芒有機小米蛋糕
以含豐富蛋白質的有機小米代替麵粉，炮製出來的蛋糕，口感鬆軟，味道清甜，適合糖尿病患者食用。
紅黃甜椒醬野米班戟
以白酒蜜糖配以甜椒做成的啫喱面層，賣相非常吸引，配上野米班戟和青蘋果薄片，幾分酒意加半點清香，再三回味。
法國鴨醬小多士
香脆有咬勁的多士面，放滿上等的法國鴨醬及香濃的芝士，味道清新！
Munch（29529991）
地址：尖沙嘴諾士佛台1號一樓
收費：每款食物每打$195，兩打起，五天前預訂。訂購滿$5,000免運輸費。
中美意法泰 一次過食晒
到會給人的印象都是餐單Set死晒，食物選擇少，份量又多，兼且取貨限時限刻。不過今年m.a.x.concept推出的聖誕到會套餐，不但提供中美意法泰的美食，由冷盤小食熱葷到甜點都可以自己揀，更可於全港超過十多間分店提取，方便到極。
法式燒羊架 $158/10件
有別於一般羊架，其肉質嫩滑，入口即溶，而且一點羶味都無。原來大廚用上乘紅酒將羊架預先醃製，令唔好羊的我都食指大動！
雜錦鮮莓果凍 $90/10客
士多啤梨味的果凍顏色已經夠繽紛，內裏加入士多啤梨、藍莓、紅莓等新鮮水果，口味清新又健康。
美國原隻燒釀火雞 $448
足14磅大火雞，釀入甘笋、芹菜等，還以百里香作醃料，其辛香不但豐富了味蕾，還去油膩，吃起來更起勁。
m.a.x.concepts（21011268）
收費：不設最低消費，須三天前預訂，今日訂購可獲9折優惠。