Daihatsu搶鮮新生兒　80°車門孖住上

的骰可愛激似K-car嘅大發仔，一向甚得女孩子歡心，近年Move更攻陷型男少女市場，尤其日本就更Hit。嚟緊呢款全新SIRIONRacy五門揭背小房車更進一步，外形比普通版Sirion更型更跑，兼且內櫳闊落有驚喜，而且較一般車仔更優勝之處，係80°三段式車門開啓幅度，設計更開揚，幾乎兩個人孖住上落車都冇難度！

記者：梁美甜
攝影：陳陶鈞
模特兒：Fion

第一眼見到SIRIONRacy的確有眼前一亮嘅感覺，因為成部車加晒包圍同定風翼，前後沙板仲鬼咁突出，外形流線咗兼更具肌肉感。霧燈係我見過車款入面最大嘅，加上全黑車身，連座椅都以黑配紅做成，跑味出晒嚟，而內櫳唔使講依然係又大又夠空間，比年中推出嘅Sirion1.5更加時款型仔同實用。最盞鬼始終係車門，可作三段式開啓，最大幅度達80°，差啲成直角，誇啲講句，兩個人孖住上落都得喇！

搶先出車平多幾千

𠵱家咩都貴，揸車最貴嘅就梗係油喇，Daihatsu好多車款都喺1,500c.c.以下，慳番唔少牌費同油錢，而最新1,500c.c.嘅SIRIONRacy排氣系統仲符合歐盟IV型標準，換句話講，出車即享政府環保車嘅優惠，而車行仲嚟個「搶鮮」優惠，頭10名買家仲可以平多$3,500，以$123,255出車，真係慳番唔少！
SIRIONRacy引擎同樣用咗品牌獨有嘅DVVT技術，以及世界首創嘅超級智能催化劑，提升性能之餘亦更慳油，環保絕對係新生代嘅我哋所要追求。

掟彎利落

性能不俗，揸起嚟容易又夠力，代步一定足夠，若然車身再降低啲，相信連掟彎都更利落。