轉眼間2007年就快過去，韓國網友經已急不及待清算今年走紅同埋倒楣藝人。韓國Daum討論區就選咗國民影后全度妍、人氣女星尹恩惠同組合WonderGirls、BigBang成為07年大贏家。至於韓佳人、IVY等就因為負面新聞盡出，慘成最失敗韓星。
尹恩惠掀短髮潮
全度妍憑住電影《密陽》，成為首位奪康城影后嘅韓國人，對國民嚟講絕對係值得高興嘅事，之後佢連奪青龍等多個電影獎影后寶座，令事業攀上高峯。尹恩惠就憑韓劇《咖啡王子》嘅演出令fans眼前一亮，唔少女星仲跟風將頭髮剪短。至於樂壇代表就有WonderGirls同BigBang，佢哋首歌《TellMe》同《謊言》簡直連老中青都識得唱。
有升亦有跌，IVY就因為俾前男友勒索而人氣直插谷底，唔少網友仲狠批佢一腳踏兩船，至令前男友有咁激嘅行為。女星韓佳人就因為劇集《魔女柔熙》唔收得，大罵導演編劇冇料到，令清純形象破產。其餘仲有俾老公告通姦罪嘅女星玉素利，同埋企圖逃兵役嘅男歌手PSY，睇嚟佢哋短期內都難翻身。
網址： http://tvzonebbs3.media.daum.net/griffin/do/phoshop/read?bbsId=A000009&searchValue=&articleId=206412
版主：網盜王尊尼Deep
本欄逢周一至五刊出