十誡治軍！冇聽錯，卡比路為咗滿足佢要幫英格蘭國家隊贏世界盃嘅欲望，據報會將佢以前執教球會嘅10大規條，經修訂後套用喺英軍身上，我求大俠初步睇都幾嚴格，班英軍大牌球星，知驚未？
事不宜遲，先講第1誡，就係要求球員要注意言行，集訓時禁止同老婆、女友交往，仲要夜晚10點實行「宵禁」，防止球員外蒲，而第8誡出訪衣着要一致，講到尾係唔想班球員影衰國腳身份。你知啦，班英軍球員個底咁花，卡比路當然唔想佢哋嘅醜行，成日喺英國《太陽報》出現。另外，卡比路不嬲憎人唔注意飲食，特別憎肥仔，當年就試過棄用「肥哨」朗拿度，睇吓啲英軍國腳敢唔敢亂食嘢？
若捧世盃卡帥袋2.6億
第2誡係球員集訓期間嚴禁用手提電話，聽親鈴聲實鬧人。第3誡係要求球員操練前半粒鐘要到達兼換好衫，遲到必罰錢（呢一招，碧咸以前踢皇馬都領教過）。第9誡最重要，係要球員遵從教練，唔准駁嘴，因為教練永遠是對的喎！擺明係建立卡比路自己威信。
至於其他，好似第5誡球員接受訪問唔可以超過10分鐘，就咁聽幾苛刻，查實係想球員內斂啲，同第10誡咪自大係一致嘅。又係嘅，英軍輸俾克羅地亞後，被對方將帥明寸衰自大，聽落都有道理。總之，違規者輕則罰錢，重則被踢出國家隊，天王老子都係咁話。
好啦，卡比路咁緊張，除咗因為佢話明，呢份係佢最後一份工之外，佢日前誓神劈願要帶領英格蘭捧走2010年世界盃，野心好大。據講，假如佢真係達標，英足總會派發500萬鎊（約7,850萬港元）花紅畀佢，加埋佢未來30個月大約1,150萬鎊嘅薪酬，即係捧盃大約有成1,700萬鎊（約2.67億港元）落袋，厲害。為理想、為荷包，你話卡比路唔用重典又點得呢？