中央加大宏調力度、任總話次按風暴令本港有銀行見紅，令港股上個禮拜飽受煎熬，於是有網友即刻整個港股信心指數調查，1分代表完全冇信心，10分信心爆棚，睇吓網友嘅受驚程度去到邊個位。
等反彈即走
唔少網友覺得個市好弱，以馬論馬仲話：「我畀1分，沽爆佢，十年難得一見大升市之後嘅大跌市。」6Fman亦好抵死咁畀1分，佢話：「有信心個市唔掂，沽突」。
對於swhui5話博反彈立刻盡沽出，jaychan88覺得：「後市唔見得會有咩特別好消息再出到嚟，直通車冇可能咁快開，連時間表都未有。老美嗰邊，睇佢個勢真係有排都未搞得掂，次按單嘢會有咩好消息吖！個市真係跌到你唔信，不過諗住等多日反彈先走。」
至於部份網友好似Flatland咁一動不如一靜，一於睇定啲，不賣不買。
不過，亦有好多網友似乎唔係咁驚，話想睇定啲然後趁低吸納，chinafund話：「其實信心係隨股市升跌而改變。」