相信大家睇開《蘋果日報》，都知道上排立法會港島議席補選。商業觸覺非常敏銳嘅《蘋果日報》管理層，知道大家對嗰次補選非常有興趣，所以喺補選投票日搞搞新意思，喺日報以外嘅傳媒空間，提供最新資訊。
除咗投票日下午出特刊，仲喺election.atnext.com搞咗個直播網站，邀請好多同補選有關嘅人，同大家分享感受。同補選有關嘅，當然一定有當日嘅候選人。
點知，補選結束後，孫柏文睇友報《大公報》，先知有個當日喺我哋網站有份發言嘅候選人，唔開心。聽聞係因網站上嘅言論，所以發律師信嚟。根據《大公報》，呢位候選人就係蕭思江。
蕭思江喺《大公報》表示，佢最唔開心係被形容為「無名腫毒」。大家都知，特區法律界充斥港英餘孽，所以書信來往都會用英文。我喺度諗，究竟點樣繙譯「無名腫毒」呢四個字？諗咗好耐，都諗唔到。
港女，請睇片
最後，我都係要問人。根據我嘅法律顧問，原來「無名腫毒」嘅正確繙譯應該係NoNameSwollenToxin。真係唔講都唔知。希望大家同我一樣，知道正確繙譯之後，有如前特首董建華話齋，增咗值。
講起嗰次補選，真係雲集唔少唔同背景嘅候選人，各有所長。喺跳舞呢個範疇，相信冇候選人比候選人何來更專業。可能因為呢個原因，所以投票當日，何來做直播網站嘉賓時，主持人就把握機會問：「究竟蕭思江嗰隻『飯碗必勝舞』，係咪舞呢？」何來就斬釘截鐵咁答：「唔係。」真係估唔到專業舞蹈家，同我嘅見解唔同。
最後，噚日我話港女喺舞池上跳舞，雙手同手臂好似啲遇溺嘅人咁，隨機瘋狂擺動。篇文出街後，有好多港女寄電郵嚟問：「跳舞手臂『瘋狂擺動』，唔靚咩？」今日，唔直接答你，用例子答你。自己睇片。
http://www.youtube.com/watc?v=SSfjkjjbv7w
金手指網誌： http://phatdat.blogspot.com