上個禮拜四，上石化（338）喺深圳香格里拉大酒店舉行嘅臨時股東大會，發生小股東同工作人員嘅衝突事件，為咗點票程序爆發爭拗，大鬧會場，部份小股東更搶奪點票箱，有女股東報稱被保安打傷，搞到現場一片混亂。雖然後尾點票都順利完成，但個股東會爭啲搞到打交收場，上石化都咪話唔醜。
上石化嘅董事會秘書張經明噚日代董事長戎光道出嚟解畫，話班A股股東咁躁，可能有兩個原因，第一個可能係近排上海股市牛皮，唔少股民「坐艇」，積埋唔少怨氣，咪喺個股東會度將啲怨氣發洩出嚟囉。
第二個原因，一句講晒，都係錢作怪啫，內地小股東唔滿意阿媽中石化（386）舊年提出嘅股改方案，遲遲都唔落實，冇錢收梗係㷫啦！張經明就話：「上石化嘅最新股改方案將會喺今日公佈。」咁究竟班A股小股東收唔收貨？條氣會唔會順番？就要睇今日嘅股改最新進展（詳情請睇B4版嘅報道）。